«Այսպիսի կատակլիզմներով, ինչպիսին առկա է մեր երկրում, անցել են բոլոր այն երկրները, որոնք հիմա երջանիկ են ապրում, և սուվերեն երկրներ են: Չմոռանանք, որ երկու անգամ մեր գլխին անկախությունը իջավ վերևից, առաջին անգամ Կովկասյան ֆեդերացիան քանդվեց, երկրորդ անգամ՝ Խորհրդային Միությունը: Իսկ հիմա մենք կռիվ ենք տալիս մեր ազատության համար. սա ազատագրական պայքար է»,- այս մասին «Առաջին լրատվական»-ի հետ զրույցում ասաց դերասան, քաղաքական սատիրիկ Սերգեյ Դանիելյանը՝ հավելելով, որ մեզ պետք է հավաքվել ուժեղանալ և դիմակայել թշնամուն:
ՀՀ կառավարության որոշմամբ ընդունվել է ռազմական դրության որոշման մեջ փոփոխություններ անելու մասին նախագիծ, որով սահմանափակումները խստացվել են. արգելվում է հայկական և արցախյան զինված ուժերի մասին տեղեկություններ հրապարակելը: Սերգեյ Դանիելյանի դիտարկմամբ՝ դեռևս ուշ չէ, և այս փոփոխության անհրաժեշտությունը կար:
«Մենք հիմա գտնվում ենք մեդիա պատերազմի մեջ, նախկին իշխանության որոշ ներկայացուցիչների ստատուսները համըկնկում են Ալիևի ստատուսների հետ: Եվ արդեն ասվել է, որ կան դավաճանության փաստեր՝ամենաբարձր մակարդակով… 2001թ-ից առաջ այդ մարդկանց կարելի էր գնդակահարել ռազմի դաշտում, բայց հետո մենք հումանիստական օրենքներ ընդունեցինք, և դա հիմա չենք կարող անել, բայց կարելի է գոնե «փակել» նրանց: Կան ռազմական դրության օրենքներ, որ պետք է կոշտ գործել՝ սկսած գույքի բռնագարվումից, վերջացրած «փակելով»… Ամբողջ ազգով փող ենք հավաքում… Արդյո՞ք զինվելու համար նորից թավիշ պիտի խաղանք՝ իմանալով, որ մոնումենտի դղյակները մեր առաջնագծի տանկերն են, մեր զինվորների կյանքերն են: Նրանց պետք է բռնել, տանել բանկ և ասել հանի գումարներդ ու տուր բանակին: Դա պետք է արվի բռնի ուժով»:
Մանրամասն՝ տեսանյութում: