Ամերիկյան հնարավոր դեֆոլտը ներկայում ֆինանսական, տնտեսական (և ոչ միայն) շրջանակների ամենաբուռն քննարկումների թեման է: ԱՄՆ կոնգրեսականները մինչև այս կիրակի օրը, երբ բացվելու է Ասիական նստաշրջանը, հավանաբար որևէ որոշում կկայացնեն: Այս հարցի լուծման ձգձումը իր մեջ պարունակում է քաղաքական բաղադրիչներ՝ հանրապետականները Բ.Օբամայի վրա փորձում են ճնշումներ գործել, բայց ի վերջո մինչև օգոստոսի 2-ը Կոնգրեսում որոշում կկայացվի և կներկայացվի բյուջեի ծախսերի ու դեֆիցիտի կրճատման ծրագիր և կորոշվի պարտքի վերին շեմի բարձրացման խնդիրը: Ամեն դեպքում, մասնագետները գտնում են, որ հարցը կլուծվի շատ ավելի լավատեսորեն և թույլ չեն տա, որ խնդիրը բարդանա:
«Առաջին լրատվականի» հետ զրույցում Forex Club-ի վերլուծաբան Միքայել Վերդյանը նշեց, որ ԱՄՆ-ում դեֆոլտ չի կարող լինել, իսկ որոշակի պետական պարտատոմսերի նկատմամբ, եթե կոնգրեսականները չկարողանան համաձայնության գալ, հնարավոր է տեխնիկական դեֆոլտ հայտարարվի, ինչին կարձագանքեն վարկանշային ընկերությունները, իսկ ԱՄՆ վարկային վարկանշի իջեցումը որոշակի ցնցումներ կբերի:
Վերջին շրջանում հայկական ֆինանսական շուկայում թե՛ մեր ազգային արժույթի, թե՛ եվրոյի նկատմամբ պահանաջակը մեծացել է, որովհետև, ըստ Մ.Վերդյանի, քաղաքացիները հիմնականում հրաժարվում են դոլարից, հաշվի առնելով ռիսկերը, որոնք սպասվում են օգոստոսի 2-ին. «Սակայն դրա համար հիմքեր չկան, և ԱՄՆ դեֆոլտ չի հայտարարի:
Խնդիրը կլուծվի, մեր շուկան ևս կոնսոլիդացիայի մեջ կմտնի, և ԱՄՆ դոլարն իր դիրքերը կրկին կբարելավի դրամի նկատմամբ»:
Մ.Վերդյանը չբացառեց, որ այս շրջանում դրամի արժևորման մեջ դեր ունեն նաև տրանսֆերտներն ու սեզոնայնությունը, քանի որ հուլիսին տրանսֆերտային փոխանցումները հասնում են առավելագույն ծավալին, սակայն շեշտեց, որ իրարանցումը մեծամասամբ պայմանավորված է ամերիկյան դեֆոլտի սպասումներով:
Մեր դիտարկմանը, թե անկախ նրանից՝ ԱՄՆ դեֆոլտ կհայտարարի, թե ոչ, գնաճային մեծ սպասումներ կան, վերլուծաբանը պատասխանեց, որ շուկայում տրամադրությունները բավականին լավատեսական են, զարգացող տնտեսությունները՝ Չինաստանը, Հնդկաստանը և այլն, զարգացման նոր, ավելի մեծ թափ կառնեն և կավելացնեն հումքային ապրանքների նկատմամբ պահանջարկը և շուկայում հումքի գները հակված կլինեն դեպի աճ: Մ.Վերդյանը նշեց, որ այդ առումով մեծ նշանակություն կունենան իրադարձությունները ֆինանսական շուկայում. «Չի կարելի մոռանալ եվրոգոտու պարտքային խնդիրները: Մուդիսը Իսպանիայի վարկանիշը տեղադրել է ցուցակի մեջ, որպեսզի վերանայվի իջեցման ուղղությամբ: Եթե պարտքային խնդիրները, տարածվեն ավելի մեծ տնտեսությունների վրա, ապա կարող են խոչընդոտել ապրանքային շուկաներում գների սպասվելիք բուռն աճին: Եթե խնդիրները կարգավորվեն, ապրանքային շուկաներում գները առանց մեծ տատանումների կբարձրանան մինչև տարեվերջ»:
Հիշեցնենք, որ ԱՄՆ բյուջեի շուրջ բանակցությունները կրկին տապալվել են. ԱՄՆ նախագահի վարչակազմը և Կոնգրեսի Ներկայացուցիչների պալատը կրկին չեն կարողացել համաձայնության գալ ԱՄՆ պետական պարտքի վերին շեմի հարցով: Դեֆոլտին մնաց 3 օր:
