Անտեսելով հոկտեմբերի 10-ի ժամը 12.00-ից մարդասիրական նպատակներով հայտարարված հրադադարը, ադրբեջանական ստորաբաժանումները 12.05-ին գրոհ են ձեռնարկել Կարախամբեյլի կոչվող տեղամասի ուղղությամբ: Արցախի պաշտպանության ստորաբաժանումները դիմում են համապատասխան միջոցների՝ կասեցնելու գրոհները: Ադրբեջանական զինված ուժերը կրակի տակ են պահում նաև Հադրութը:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության գործադիր մարմնի անդամ Հայկ Սահակյանը և ԱԺ «Իմ քայլը» խմբակցության պատգամավոր Սարգիս Խանդանյանը:
Անդրադառնալով դիտարկմանը, որ Ադրբեջանը բացահայտ անարգանք է ցուցաբերում իր իսկ ստանձնած պարտավորությունների և այս գործընթացը միջնորդողների նկատմամբ՝ Սարգիս Խանդանյանը նշեց, որ Ադրբեջանի այսպիսի վարքը սպասելի էր: «Հրադադարի մասին համաձայնությունը ստորագրելուց հետո Ադրբեջանն ավելի ակտիվացրեց ռազմական գործողությունները, հարվածներ հասցրեց թե՛ Արցախի, թե՛ Հայաստանի՝ Կապանի համայնքների ուղղությամբ. սա թուրքադրբեջանական ձեռագիր է… Պետք է աչալուրջ լինել»,- նշեց պատգամավորը՝ հույս հայտնելով, որ վերջապես Ադրբեջանի քաղաքական ղեկավարությունը կսթափվի և կհարգի իր իսկ ստանձնած պարտավորությունները»:
Հայկ Սահակյանի դիտարկմամբ՝ ադրբեջանաթուրքական գործողություններն անկանխատեսելի են, մեկ բան պայմանավորվում են, այլ բան կատարում: «Նրանց վարքը նորություն չէ, նախագահի մակարդակով ստահոդ լուրեր են տարածում, պարբերաբար խախտում են միջազգային իրավունքը: Հայաստանը պետք է կարողանան որևէ կերպ պատժիչ գործողություններ իրականացնի, որ նրանց մտքի ծայրով անգամ չանցնի խախտել իրավունքները, դա պետք է լինի կա՛մ ռազմի դաշտում, կա՛մ դիվանագիտության: Մենք պետք է կարողանանք բանակցային տրամաբանությունը դուրս բերել իրեն չարդարացնող ձևաչափից ՝ շեշտադրում կատարելով ինքնորոշման սկզբունքի վրա»,- նշեց Սահակյանը:
«Միջազգային հանրությունը պետք է հասկանա, որ սա տարածքային խնդիր չէ, սա Արցախում բնակվող բնակչության էքզիստենցիալ, կյանքի իրավունքի պաշտպանության հարցն է,- նշեց Խանդանյանը՝ ընդգծելով, որ Արցախի ճանաչումը չափազանց կարևոր է, և Հայաստանի քաղաքական ու դիվանագիտական օրակարգում կա այդ հարցը կա:
Մանրամասն՝ տեսանյութում:
