Մեր զրուցակիցն է Թբիլիսիի Black Sea Press գործակալության գլխավոր խմբագիր, քաղաքագետ Գելա Վասաձեն։
– Ադրբեջանական մամուլում հրապարակումներ են հայտնվում, որտեղ նշվում է, որ այս պատերազմում Վրաստանն աջակցում է Ադրբեջանին։ Նշվում է, որ Վրաստանը թույլ չի տվել ռազմական բեռներ մտնեն Հայաստան, դրանով օգնելով Ադրբեջանին։ Ինչպե՞ս եք գնահատում նման տեսակետները, նաև այն ֆոնին, որ իսրայելական զենքերը հենց Վրաստանի օդային տարածքով են հասնում Ադրբեջան, ինչի մասին գրում է նաև իսրայելական մամուլը։
– Եկեք սկսեք նրանից, որ Վրաստանի դիրքորոշումը հստակ ներկայացրել են մեր երկրի նախագահը, վարչապետը և ԱԳ նախարարը։ Վրաստանը թույլ չի տալիս ռազմական բեռների տարանցումը պատերազմող որևէ կողմին։ Նշեմ, որ բոլոր տեսանյութերը, որոնք ես տեսել եմ համացանցում, ստուգումից հետո պարզվել է, որ ֆեյք են։ Դրա մասին առանձին հայտարարել է նաև Վրաստանում Հայաստանի դեսպանությունը։ Իսկ հիմա մտածեք, թե ում է ձեռնտու հայ-վրացական հարաբերությունների լարումը պատերազմի ժամանակ, և ում գործն են առաջ տանում մի խումբ «օգտակար ապուշներ», որոնք տարածում են հակավրացական նորություններ հայկական սոցիալական ցանցերում։
– Ինչպե՞ս եք գնահատում փաստը, որ Ղարաբաղի դեմ կռվում են նաև Թուրքիան, որը վարձկան ահաբեկիչներ է տեղափոխել Ադրբեջան՝ հայերի դեմ կռվելու համար։ Արդյոք ահաբեկիչների հայտնվելը Կովկասում չի անհանգստացնո՞ւմ Վրաստանին։ Հնարավո՞ր է՝ այդ փաստը փոխի Վրաստանի չեզոք դիրքորոշումն այս հարցում։
– Դուք հիմա հարց եք տալիս, որտեղ կտրուկ ձևով առկա է կողմերից մեկի պնդումը, որը մյուս կողմը հերքում է։ Ձեզ տարօրինակ չի՞ թվում, որ ձեր հարցով ստիպում եք ինձ կողմ դառնալ։ Նկատեմ, որ ճիշտ նմանատիպ փորձեր արվում են նաև մյուս կողմից։ Իմ կողմից ոչ պրոֆեսիոնալ կլիներ պատասխանել նման ձևով դրված հարցին։
– Երկու ադրբեջանական հետախուզական անօդաչու թռչող սարքեր են ընկել Վրաստանի տարածքում։ Դա ձեզ չի՞ մտահոգում։
– Իհարկե մտահոգում է, ինչպես ընդհանրապես մտահոգում է ստեղծված իրավիճակը, որը շատ մեծ ռիսկեր է իր մեջ կրում Վրաստանի համար։ Ռիսկերի մասին ես գրել և գրում եմ շատ մանրամասն, վստահեցնում եմ ձեզ, որ անօդաչուները ամենամեծ խնդիրը չեն։
