Կենսաթոշակային հիմնադրամի նախագահ Վազգեն Խաչիկյանը, պարզվում է, հիմնավոր պատճառներ է ունեցել Վերահսկիչ պալատի ստուգումներից հետո ընդհատակ անցնելու համար: Ինչպես հայտնի է, ոչ վաղ անցյալում Վերահսկիչ պալատը ստուգումներ էր կատարել Խաչիկյանի ղեկավարած կառույցում, որից հետո, ըստ տարածված լուրերի` այնպիսի ապօրինություններ էին հայտնաբերվել, որ Խաչիկյանը ստիպված անցել էր ընդհատակ` պատճառաբանելով, թե հիվանդ է: Մեր տեղեկություններով, ստուգումների արդյունքում պարզվել է, որ Հայաստանում 50-60 հազար մեռյալ հոգիներ թոշակ են ստանում, որը ամսական կազմում է մոտ 4 մլն դոլար: Ընդ որում, պարզվել է, որ թոշակ են ստանում անգամ մարդիկ, ովքեր դեռ 18-19 տարի առաջ են մահացել: Մեր տեղեկություններով, համապատասխան մատյանները տարվել են ԱԱԾ, այնտեղից վերջին երեք տարվա տվյալների մասով ստուգումներ են սկսվել: Հետո ԱԱԾ-ն հրահանգ է ստացել նախագահականից եւ անձամբ ԱԱԾ տնօրեն Գորիկ Հակոբյանից` գործը դադարեցնելու մասին, ինչից հետո Խաչիկյանը, ասես ոչինչ էլ չի եղել, նորից սկսել է աշխատանքի գալ:
