Լիբիայի ընդդիմադիր անցումային կառավարության անդամներից մեկը` նախարար Ալի Թարխունին ասել է, որ Լիբիայի ապստամբների զինվորական ղեկավար, գեներալ Աբդ Ալ-Ֆաթահ Յունուսը սպանվել է ուրբաթ օրը ապստամբների խմբի կողմից, որը նրան պետք է տեղափոխեր իրենց ոչ պաշտոնական մայրաքաղաք Բենղազի` հարցաքննության համար: Այս մասին հաղորդում է BBC-ն:
Նախարարը բացատրել է, որ ապստամբների հրամանատարը, որին հանձնարարվել էր գտնել Յունուսին Բրեգայի մոտ ռազմական ճակատում, այժմ ձերբակալված է և խոստովանել է, որ իր ենթականերն են գնդակահարել գեներալին, իսկ նրա մարմինը գցել քաղաքի արվարձաններից մեկում: Այս պահին հայտնի չէ, թե արդյոք դավաճանության մասին տեղեկությունները համապատասխանում են իրականությանը, թե սա պատվիրված սպանություն է: Երեկ ապստամբների կառավարության ներկայացուցիչներն ասել էին, որ Քադաֆիի կառավարության նախկին անդամ Աբդ Ալ-Ֆաթահ Յունուսը, որ անցել էր ապստամբների կողմը, շարունակել էր համագործակցել Քադաֆիի հավատարիմ ուժերի հետ և նրանց զենք էր մատակարարել:
Մինչդեռ Տրիպոլիի կառավարության ներկայացուցիչ Մուսա Իբրահիմն ասել է, որ Յունուսի սպանության մեջ մեղավոր են «Ալ-Քաիդայի» գրոհայինները: Այս հայտարարությունը պատահական չէ արված, քանի որ Քադաֆիի կառավարությունն ապստամբներին ներկայացնում է որպես իսլամիստական գրոհայիններ, որոնք քաոս են տարածելու ոչ միայն Լիբիայում, այլևս միջերկրածովյան ողջ տարածաշրջանում:
