Ղարաբաղա-ադրբեջանական շփման գոտու ողջ երկայնքով ընթացող մարտերին զուգահեռ, Նախիջևանի հատվածում հանգիստ է։ Նախիջևանի սահմանակից համայնքների ղեկավարների խոսքերով՝ կրակոցներ չկան, սահմանին ամեն ինչ հանգիստ է, ամեն մարդ իր գործին է։
«Ամեն ինչ նորմալ է, հանգիստ է, ոչ մի լարվածություն, առավել ևս խուճապ չկա։ Բոլորն իրենց տեղերում, իրենց գործին են»,- «Առաջին լրատվական»-ի հետ զրույցում ասաց խոշորացված Զառիթափ համայնքի ղեկավար Սիմոն Բաբայանը՝ նշելով, որ մարդիկ զգոնությունը չեն կորցնում, աչալուրջ հետևում են իրավիճակին, բայց անհանգստանալու կարիք չկա։
Սեպտեմբերի 27-ից հրադադարի ռեժիմի խախտման որևէ դեպք չի գրանցվել նաև Արարատի մարզի Զանգակատուն համայնքում։ Համայնքի ղեկավար Հովիկ Կարապետյանն ասաց, որ, օգտվելով խաղաղ իրավիճակից, ամբողջ գյուղով զբաղված են Արցախում կռվող տղաներին օգնություն ուղարկելու գործով։ «Կրակոցներ չեն եղել։ Իրավիճակը հանգիստ է։ Սովորաբար սահմանային լարվածությունների դեպքում, հուլիսյան մարտերի ժամանակ էլ մեր հատվածում կրակոցներ լինում էին։ Ոչ ինտենսիվ, բայց առանձին կրակոցներ հնչում էին, բայց այս անգամ, հակառակը, արտասովոր ձևով լուռ են։ Մենք էլ հիմա զբաղված ենք տղաներին օգնություն ուղարկելով»,- ասաց Կարապետյանը՝ հավելելով, որ ոչ մի պարագայում չեն կորցնում զգոնությունը։ «Մենք սահմանապահ գյուղ ենք, զգոնությունը կորցնելու իրավունք չունենք»,- ասաց նա։
«Իմ համայնքում ամեն ինչ նորմալ է, ժողովուրդը դուխով, իրենց տներում սպասում են հրամանի՝ գնան և տղաների կողքին կանգնեն, կռվեն։ Բոլորն էլ դուխով են, մարտական ոգին շատ բարձր է»,- իր հերթին ասաց Երասխ համայնքի ղեկավար Ռադիկ Օղիկյանը։
Նշենք, որ արցախա-ադրբեջանական սահմանի ռազմական գործողություններին զուգահեռ, միայն հայ-ադրբեջանական սահմանի Վարդենիսի հատվածում էր իրավիճակը սրվել վերջին երկու օրվա մեջ։ Հակառակորդը նախօրդ օրը ռմբակոծել ու ԱԹՍ-ներով հարվածներ էր հասցրել Վարդենիսի գյուղերին։
Արծրուն Հովհաննիսյանը այսօր առավոտյան նշեց, որ մարտական գործողություններ ՀՀ սահմանի Վարդենիսի հատվածում չկան։