The Guardian պարբերականը հրապարակել է Ադրբեջանի կողմից սիրիացի վարձկանների կռվելու մասին «Լեռնային Ղարաբաղ. առնվազն 3 սիրիացի զինյալ է մահացել» վերնագրով հերթական հոդվածը։
Հրապարակման համաձայն, Լեռնային Ղարաբաղի «վիճելի» տարածքում առնվազն 3 սիրիացի զինյալ է սպանվել, ինչը հաստատում է այն տեղեկությունները, որ Հայաստանի և Ադրբեջանի միջև բախումներում օտարերկրյա ուժեր են ներքաշված։ Սա, ըստ պարբերականի, ավելացնում է այն մտահոգությունները, որ կողմերի միջև բախումները կվերաճեն ավելի լայն տարածաշրջանային հակամարտության։
Ըստ վերլուծաբանների, Թուրքիայի միջամտությունը հակամարտությանը վտանգավոր նոր գործոն է, որը սպառնում է ընթացող մարտերն ավելի երկար և արյունալի դարձնել: Դա նաև վտանգ է ներկայացնում հակամարտությունում տարածաշրջանի այլ դերակատարների ներգրավման առումով՝ դառնալով երրորդ թատերաբեմ Թուրքիայի և Ռուսաստանի միջև հակասություններում, որոնք դրսևորվել են Սիրիայում և Լիբիայում հակամարտությունների հակառակ կողմերին աջակցությամբ, ինչպես նաև ահազանգեր բարձրացնելով հարևան Իրանում։
Թուրքիան և Ադրբեջանը հերքում են այն լուրերը, որ սիրիացիները ներգրավված են Լեռնային Ղարաբաղի մարտերում։ Նրանք Հայաստանին մեղադրել են քուրդ զինյալների հավաքագրելու մեջ, սակայն ապացույցներ չեն ներկայացրել։
The Guardian-ը նշում է, որ Սիրիայի Իդլիբի նահանգից մի քանի զինյալներ պատմել են այն մասին, որ զինվորական հրամանատարները և միջնորդներն իրենց առաջարկել են մեկնել Ադրբեջան՝ դիտակետերը և նավթի ու գազի օբյեկտները հսկելու։ Պայմանագիրը կնքվել է 3-6 ամսով, ամսական 700-1000 դոլար վարձատրության դիմաց, ինչը համեմատաբար մեծ գումար է Սիրիայի համար։