Եթե Ապրիլյան պատերազմի ժամանակ հարցը լուծված լիներ, մենք գերակա բարձունքներն ունենայինք և գոնե վերականգնվեր այն դիրքը, որ կար 94-ից, վստահաբար այսօրվա պատերազմը չէր լինի: Այս անգամ որևէ գերտերության թելադրանքի չպետք է ենթարկվել: Այս մասին «Առաջին լրատվական»-ի հետ զրույցում ասաց ազատամարտիկ, ազգագարագետ Գագիկ Գինոսյանը՝ հավելելով, որ ոչ թե մեր առաջխաղացման ժամանակ թող հորդորեն, այլ երբ խաղաղ բնակչության վրա են կրակում:
«Մեր դեմ երկու պետություն է կռվում: Մեր սահմանները պետք է ամուր լինեն և պատրաստ՝ հակահարված տալու: Այս պատերազմը պետք է ավարտվի Հայաստանի նոր սահմաններով, նոր բարձունքներով, որոնք կպարտադրեն թշնամուն գոնե մոտ ժամանակներում նման ագրեսիա չցուցաբերել մեր նկատմամբ»,- նշեց Գինոսյանը:
Այս պատերազմը մենք չենք սկսել, բայց մենք պետք է ավարտենք: Մեր զրուցակցի դիտարկմամբ՝ պետք է բացառել խաղաղապահների տեղակայումը:
«Վայ մեզ, եթե մենք նորից հաղթենք ու դրանից հետո դիվանագիտությունը պարտվի: Մենք Արցախյան պատերազմը հաղթեցինք, բայց խաղաղությունը պարտվում էինք, և այդ պարտությունը նոր պատերազմ է պարտադրում»,- նշեց մեր զրուցակիցը: Նա նաև ընդգծեց. «Վայ մեր իշխանությանը, եթե որևէ մեկի զանգով դադարեցին այս պատերազմը»:
Մանրամասն՝ տեսանյութում: