Սիրիայի հարցով ամերիկացի փորձագետ Էլիզաբեթ Ցուրկովը ասել է, որ ինքը գիտի մի քանի սիրիացիների, ովքեր գրանցվել են որպես վարձկաններ՝ Ղարաբաղ ուղարկվելու համար: Նրա խոսքով՝ դեռ Ադրբեջանում նրանց ժամանման մասին հաստատում չկա: Նա գրում է, որ կարող է միայն հաստատել Սիրիայի հյուսիս-արևմուտքից անհայտ ուղղությամբ թուրքամետ խմբավորումների տասնյակ մարտիկների մեկնելու փաստը:
Նրանց մեծ մասը Սիրիայի ազգային բանակի (SNA) անդամներ են՝ զինված խմբավորումների համախումբ, որը կռվում է Սիրիայում Թուրքիայի ղեկավարության ներքո՝ գրում է փորձագետը:
Նա պարզաբանում է, որ սխալ է նրանց ընդդիմություն կամ խռովարար անվանելը. ապացույցներ չի տեսել այն մասին, որ նրանք կռվել են Ասադի կառավարական ուժերի դեմ: Դրանք օգտագործվում են ԴԱԻՇ ահաբեկիչների ու քրդական կազմավորումների դեմ:
Ցուրկովը գրում է, որ անցյալ տարվա վերջից Լիբիայում կռվում են հազարավոր SNA մարտիկներ՝ Թուրքիայի աջակցությունը վայելող կառավարական ուժերի կողմից: Նրանք այնտեղ ձգտում են լինել հանուն ավելի բարձր աշխատավարձերի, քան Սիրիայում:
SNA-ն պաշտոնապես հերքում է իր մարտիկների մասնակցությունը Լիբիայի և Ղարաբաղի հակամարտություններին:
Ցուրկովը, վկայակոչելով ՄԱԿ-ի զեկույցը, պնդում է, որ SNA մարտիկները համակարգված կերպով թալանում են բնակչությանը, փողեր շորթում, մասնակցում են մաքսանենգության և մարդկանց թրաֆիգինգով, ինչպես նաև խոշտանգում են բանտերում գտնվող բանտարկյալներին: