«Ռազմական խնդիրը ադրբեջանական բանակի վրա է դրված, այս պատերազմը կտևի այնքան, որքան կբավարարեն ադրբեջանական բանակի ռեսուրսները և հոգեբանությունը: Եվ դրանից հետո կարևոր է, թե արդյոք հայկական կողմը ճիշտ կհամարի հակահարված հասցնելը, թե հրադադար հաստատել: Բարդ երկընտրանք է… Ուժեղ հակահարվածը ենթադրում է զոհեր, բայց ապահովելու ենք տարիների խաղաղություն»,- «Առաջին լրատվական»-ի հետ զրույցում այս մասին ասաց հրապարակախոս Հրանտ Տեր-Աբրահամյանը:
Անդրադառնալով դիտարկմանը, որ ռուս խաղաղապահների տեղակայումը Հայաստանում շատերին կարող է ոգևորել, Տեր-Աբրահամյանը նշեց, որ դա կլինի մեր ինքնիշխանության հաշվին, և աշխարհում շատ են նման առաքելությունների ձախողված փորձերը:
«Նախ՝ խաղաղապահների տեղակայումը հնարավոր է միայն որոշակի զիջումներից հետո: Եվ երկրորդ՝ խաղաղապահների տեղակայումը չի նշանակի խաղաղության հաստատում»,- ընդգծեց հրապարակախոսը՝ հավելելով, որ դարեր շարունակ հայի կյանքը գին չի ունեցել, և միայն հայկական բանակը կարող է պաշտպանել հայի անվտանգությունը:
«Արդյոք մենք հիմա նորից պատրաստ ենք մեր անվտանգությունը վստահել երրորդ կողմին՝ թեկուզ դաշնակցին, որի դառը փորձն ունեցել ենք: Մենք չենք կարող մեր անվտանգությունը վստահել ուրիշին, իսկ ռուսական խաղաղապահ զորքի տեղակայումը հենց դա կնշանակեր»,- նշեց Տեր-Աբրահամյանը:
Մանրամասն՝ տեսանյութում: