Լիագումար նիստի ընթացքում Պետդուման Լեռնային Ղարաբաղում տիրող իրավիճակի վերաբերյալ որոշում է ընդունել և հանդես եկել հայտարարությամբ: Պատգամավորները հայտարարում են կրակի անհապաղ դադարեցման, ինչպես նաև տարածաշրջանում առճակատման սրումը կանխելու անհրաժեշտության մասին: Նրանք պնդում են, որ իրավիճակի խաղաղ կարգավորումն այլընտրանք չունի: Այս մասին ասվում է խորհրդարանի ստորին պալատի կայքում:
Նաև, խորհրդարանականները պատրաստ են միջնորդական օգնություն ցուցաբերել տարածաշրջանում իրավիճակի կայունացման գործում: Միաժամանակ, պատգամավորները լուրջ մտահոգություն են հայտնել հակամարտության գոտում իրավիճակի կտրուկ սրման կապակցությամբ: Նրանք դատապարտում են կողմերի կողմից ուժի գործադրումը:
Հայտարարությունը կուղարկվի Ռուսաստանի նախագահին: Այն կստանա նաև ՌԴ կառավարությունը, Ադրբեջանի և Հայաստանի խորհրդարանները: Փաստաթուղթը կուղարկվի ԵԱՀԿ Մինսկի խմբի համանախագահներին, ինչպես նաև Միջխորհրդարանական միություն, ՀԱՊԿ ԽՎ, ԱՊՀ ՄԽՎ, ԵԽԽՎ և ԵԱՀԿ ԽՎ: