«Վարդենիսի շրջանի գյուղերի ռմբակոծությունից լուրջ վնասներ չկան։ Զոհեր և վիրավորներ՝ նույնպես»,- «Առաջին լրատվական»-ի հետ զրույցում ասաց Վարդենիսի Գեղամասար համայնքի ղեկավար Հակոբ Ավետյանը, ով բնակվում է Սոթք համայնքում։ Մեր զրուցակցի խոսքով, սակայն, իրավիճակն ահավոր լարված է, արկերը ընկնում են հենց գյուղերի կենտրոնում։
Համայնքի ղեկավարի խոսքով՝ արկերից մեկն էլ ընկել ու պայթել է Սոթքում գտնվող հենց իր տան բակում: «Բայց վնասներ չկան, դարպասի մոտ է ընկել, տրաքել, ու դարպասն է վնասվել, լուրջ վնասներ չկան։ Մնացած տեղերում էլ հարվածներ են հասցվել բեսպիլոտնիկներով, հենց դրանով են զորամասի դիմաց ավտոբուսին հարվածել, բայց ավտոբուսը դատարկ է եղել, զոհեր ու վիրավորներ չկան»,- ասաց Ավետյանը։
Համայնքապետը նշեց, որ ռմբակոծվում են Սոթք, Շատվան, Կութ և այլ համայնքներ։ Առավոտից Սոթքի վրա մոտ 10 արկ է ընկել։ 5-6 արկ էլ ընկել է Կութ գյուղում, Շատվանում: «Առավոտից համատարած, մասսայական խփում են։ Նախորդ երկու օրվա մեջ գյուղերին չեն խփել, բայց այսօր արդեն գյուղերին են խփում։ Մեկ ժամ է, ինչ անդորր է»,- ասաց համայնքապետը։
Հակոբ Ավետյանն ասաց, որ ժողովրդի մոտ մարտական տրամադրություն է, բացարձակ խուճապ չկա։ Անգամ փորձել են կանանց ու երեխաներին հեռացնել, բայց ոչ ոք չի համաձայնել դուրս գալ իրենց համայնքներից։ «Բոլորը ապահով տեղերում են, բացարձակ խուճապ չկա։ Մարտական տրամադրություն է։ Բոլորը պատրաստ են պատերազմի ու պաշտպանելու մեր տարածքը»,- ընդգծեց Ավետյանը։
Հիշեցնենք, որ այսօր առավոտից Ադրբեջանը հարձակվել է ՀՀ սահմանի վրա։
Ադրբեջանի զինված ուժերը կրակ են վարել Հայաստանի Զինված ուժերի Վարդենիսի զորամասի ուղղությամբ, ինչպես նաև օդուժ կիրառել դիրքերի ուղղությամբ։
