Շվեյցարիան սատարում է ԵԱՀԿ Մինսկի խմբի համանախագահների ջանքերին, որոնք ուղղված են ղարաբաղյան հիմնախնդրի լուծմանը բանակցությունների միջոցով և պատրաստակամություն է հայտնում իր տարածքում Հայաստանի և Ադրբեջանի միջև բարձր մակարդակի հանդիպումներ ընդունել: Այս մասին ասվում է Շվեյցարիայի արտաքին գործերի նախարարության՝ երկուշաբթի օրը հրապարակած հայտարարության մեջ:
Ինչպես ընդգծել են դիվանագիտական գերատեսչությունում, Շվեյցարիան «երկու կողմերին էլ հիշեցնում է, որ նրանք պետք է կատարեն միջազգային իրավունքով սահմանված պարտավորությունները, այդ թվում` քաղաքացիական անձանց պաշտպանության հարցում»: Ըստ Շվեյցարիայի ԱԳՆ-ի՝ անհրաժեշտ է հնարավորինս շուտ վերսկսել հիմնարար բանակցությունները՝ առանց նախապայմանների, քանի որ «դա միակ ճանապարհն է, որը կարող է հանգեցնել հակամարտության խաղաղ կարգավորմանը»: