Այսօր պատերազմի երկրորդ օրն է. կարելի է ասել, որ հայությունն ընդունել է «Ամեն ինչ ռազմաճակատի համար» բանաձևը: Հայությունն արձագանքում է իրեն պարտադրված պատերազմին:
«Այս պատերազմը մենք չենք սկսել, և երևի թե ճիշտ են այն պնդումները, որ կիսատ մնացած գործընթացները պետք է ավարտվեն, հաղթանակներն ամրապնդվեն. գուցե սա հենց այն պատերազմն է, որի բովով անցնելով կկարողանանք հասնել դրան: Այս մասին «Առաջին լրատվական»-ի հետ զրույցում ասաց «Ժառանգություն» կուսակցության վարչության նախագահ Նարինե Դիլբարյանը: Նա նաև նշեց, որ եկել է պահը, որ Հայաստանը ճանաչի Արցախի Հանրապետությունը և ընդդեմ ադրբեջանաթուրքական դաշինքի՝ մենք էլ ստեղծենք հայկական դաշինքը, որը կմիավորի ոչ միայն Հայաստանը և Արցախը, այլ նաև Սփյուռքը:
ԱԺ «Իմ քայլը» խմբակցության պատգամավոր Միքայել Զոլյանը նշեց, որ բոլոր քաղաքական ուժերը միասնական դիրքրոշում են հայտնել և աջակցություն հայտնել կառավարությանն այս պայքարում: Հայության միասնությունն աննախադեպ է, նման միասնություն դրսևրովում է պատմական վճռորոշ պահերին:
Քաղաքագետ, «Հանուն Հանրապետության» կուսակցության անդամ Սարգիս Գրիգորյանը նշեց, որ ընթանում է նաև տեղեկատվական պատերազմ՝ պատերազմի բոլոր կանոններով: Նա նաև հավելեց, որ «Թվիթերում» հայ երիտասարդները մեծ աշխատանք են կատարում: Նարինե Դիլբարյանը հավելեց, որ ԵՊՀ տարբեր լեզուների տիրապետող ուսանողները, ինքնակազմակերպվելով, մեծ աշխատանք են իրականացնում: Եվ այդ ինքնակազմակերպումը «Այլընտրանք չկա, մենք պետք է հաղթենք» հեշթեգի իսկական ամրակայումն է:
Նարինե Դիլբարյանի դիտարկմամբ՝ Ադրբեջանում փակվել են իր սոցիալական մեդիաները, դա ցույց է տալիս, որ Ադրբեջանի իշխանությունը և վարչակազմը տագնապներ ունի՝ սեփական գնահատականի հետ կապված:
«Կարծում եմ հայ ժողովուրդը վաղուց դասը քաղել է. պետք է հույս դնել սեփական ուժերի, ոչ թե միջազգային հանրության վրա»,- ընդգծեց Միքայել Զոլյանը:
Քննարկման մասնակիցների դիտարկմամբ՝ այս պատերազմը դուրս է գալիս տարածաշրջանի սահմաններից:
Մանրամասները՝ տեսանյութում: