ՌԴ նախագահի պաշտոնական ներկայացուցիչ Դմիտրի Պեսկովը հայտնելով Կրեմլի տեսակետը՝ ասել է, որ այժմ ժամանակը չէ պարզել, թե ով է անմեղ և ով՝ մեղավոր Լեռնային Ղարաբաղում իրավիճակի սրման մեջ, փոխարենը հարկավոր է դադարեցնել ռազմական գործողությունները, փոխանցում է «ՌՒԱ Նովոստին»։
«Ռուսաստանը ԵԱՀԿ Մինսկի խմբի համանախագահ է և, անշուշտ, կատարում է հակամարտությունում պատրաստակամ միջնորդի դեր։ Այդ պատրաստակամությունն ընդգծվել և շեշտվել է տարբեր մակարդակներում։ Այժմ շատ կարևոր է առաջին հերթին դադարեցնել մարտական գործողությունները, ոչ թե պարզել, թե ով է անմեղ, ով՝ մեղավոր։ Ռուսաստանը միշտ հավասարակշռված դիրքորոշում է ունեցել։ Հենց այդ դիրքորոշումն է Ռուսաստանին հնարավորություն տալիս իր ազդեցությունը և երկու երկրների՝ և՛ Հայաստանի, և՛ Ադրբեջանի հետ ավանդաբար լավ հարաբերություններն օգտագործել այս հակամարտությունը կարգավորելու համար»,- ասել է Պեսկովը՝ պատասխանելով լրագրողների այն հարցին՝ ով է եղել Լեռնային Ղարաբաղում իրավիճակի սրման նախաձեռնողը և ով է դրանում հետաքրքրված։
