Իրանի «Ալիք» թերթի խմագիր Մովսես Քեշիշյանը գալիս է Հայաստան:
«Առաջին լրատվական»-ի հետ զրույցում նա նշեց, որ արդեն ճանապարհին է. «Գալիս եմ տեսնելու, գնահատելու իրավիճակը, լինելու ժողովրդի կողքին, մեր տղաների կողքին»:
Նա նշեց, որ Իրանում բոլոր հայերն էլ մտահոգ են, թե ինչ է կատարվում Արցախում, ինչպես ցանկացած հայ աշխարհի տարբեր ծայրերում. «Հետևում ենք, հույս ունենք, որ ամեն ինչը լավ կվերջանա: Բնականաբար, իրանահայությունը Հայաստանի կողքին է, հուսանք, որ մեր տղաները իրենց գործը փայլում կկատարեն: Այսօր առավոտյան լուրերը բավական հուսադրող էին: Հույս ունենք, որ և բոլոր ոլորտներում, ռազմական, սոցիալական և քաղաքական դաշտերում կկարողանանք հաջողություններ գրանցել և թշնամում խաղաղություն պարտադրել՝ ի շահ հայության»,-ասաց Քեշիշյանը:
Անդրադառնալով Իրանի դիրքորոշմանը Արցախում տեղի ունեցող դեպքերի առնչությամբ, նա ասաց. «Ես շատ կարևորում եմ իրանական դաշտը հայանպաստ դարձնելը, այն առումով, որ Իրանը շատ լավ հասկանում է իր շահը, որ այն, ինչ տեղի է ունենում Իրանի հյուսիսային շրջաններում, որպես իր հարևան, կարող է ավերիչ լինել իր ապագայի համար: Եթե պանթուրքիստական ուժերն ավելի հզորանան տարածաշրջանում, բնականաբար, դա մեծ վնաս է լինելու Իրանի շահերի համար:
Չմոռանանք իսրայելական զենքերի առկայությունը Ադրբեջանի մոտ, Թուրքիայի ներկայությունն այդ պատերազմում, նրա աշխուժությունն արդեն Ադրբեջանում, բնականաբար չի կարող դուր գալ իրանական կողմին»:
Քեշիշյանը հավելեց, որ Իրանի ԱԳ նախարարի դիրքորոշումը հավասարակշռված էր. «Մենք տեսանք Իրանի ԱԳ նախարարի դիրքորոշումը, նրա հեռախոսազրույցը Հայաստանի ու Ադրբեջանի ԱԳ նախարարների հետ, եղավ հայտարարություն պատերազմը դադարեցնելու մասին»:
