Ղարաբաղաադրբեջանական սահմանի ողջ երկայնքով ընթացող մարտերին զուգահեռ լարվածություն կա նաև հայ-ադրբեջանական սահմանին, հատկապես Վարդենիսի հատվածում։ Վարդենիսցիները «Առաջին լրատվական»-ի հետ զրույցում ասացին, որ ողջ գիշեր կրակոցներ են լսվել, տեղեկություններ ունեն, որ անօդաչու թռչող սարքերի մասին, որոնց հայկական կողմը խոցել է։
ԱԹՍ-ներից մեկը խոցվել է հենց Գեղարքունիքի մարզի Լուսակունք համայնքում։ Համայնքի ղեկավար Խաչիկ Խաչատրյանը «Առաջին լրատվական»-ի հետ զրույցում հաստատեց տեղեկությունը՝ հավելելով, որ այս պահին համայնքում ամեն ինչ նորմալ է, իրավիճակը՝ հանգիստ։ «Մեր համայնքի վրա մեկ հատ է խոցվել։ Կրակոցներ եղել են, պարզ լսվում էր համայնքում կրակոցների ձայները, գիշերը անգամ ԱԹՍ-ների լույսեր էր երևում, բայց դրանք խոցվել են։ Համայնքին ոչ մի վնաս չի պատճառվել, միայն մեկ տան տանիք է թեթև վնասվել ցնցումից, բայց խոցված անօդաչու թռչող սարքը գյուղի վրա չի ընկել, այլ դաշտի մեջ»,-ասաց Խաչատրյանը՝ կրկին հավելելով, որ համայնքում խուճապ, լարվածություն չկա, ամեն ինչ հանգիստ է, իսկ իրավիճակը՝ վերահսկելի։
Վարդենիսի համայնքապետը այդպես էլ չպատասխանեց մեր հեռախոսազանգերին, իսկ Գեղարքունիքի մարզպետ Գնել Սանոսյանն «Առաջին լրատվական»»-ի հետ զրույցում միայն ասաց, որ լարվածություն կա, բայց իրավիճակը վերահսկելի է։
Պաշտպանության նախարարության ներկայացուցիչ Արծրուն Հովհաննիսյանը հաստատել է Լուսակունք գյուղի տարածքում ադրբեջանական ԱԹՍ-ի խոցման մասին տեղեկատվությունը։