Քարնեգի կենտրոնի ավագ գիտաշխատող, բրիտանացի վերլուծաբան Թոմաս դե Վաալը ներկայացրել է ղարաբաղյան հակամարտության սրման իր տեսլականը:
Դե Վաալը գրում է, որ արդեն կարելի է փաստել փոքր պատերազմի իրողությունը. օգտագործվում են ծանր զենքեր, Ադրբեջանում մասամբ արգելափակված է ինտերնետը:
«Նախնական տեղեկությունները ցույց են տալիս, որ Բաքուն ցանկանում է փոխել տարածաշրջանում 90-ականներին ստեղծված իրավիճակը: Միգուցե (Ադրբեջանը) փորձում է օգտագործել ձմռանը նախորդող պահը, երբ միջազգային հանրությունը զբաղված է այլ խնդիրներով. ԱՄՆ-ում նախընտրական շրջան է, ԵԱՀԿ-ն ղեկավար չունի», – ենթադրում է փորձագետը:
Նա շեշտում է, որ, ի տարբերություն 1990-ականների, երկու կողմերն էլ ավելի առաջադեմ սպառազինություն ունեն, ուստի լայնամասշտաբ պատերազմի սպառնալիքը ծայրաստիճան վտանգավոր է, այդ թվում՝ խաղաղ բնակչության համար:
«Նոր գործոնն այն է, որ այս տարի Թուրքիայի աջակցությունը Ադրբեջանին շատ ավելի բաց է, քան երբևէ: Ռուսաստանը, չնայած Հայաստանի հետ ռազմական դաշինքին, շատ ավելի երկիմաստ է (իր տեսակետում) Ադրբեջանի հետ սերտ հարաբերությունների պատճառով»:
Բրիտանացի փորձագետը կարծում է, որ բռնությունները դադարեցնելու համար այժմ վճռական նախաձեռնություն է պահանջվում ԵԱՀԿ Մինսկի խմբի համանախագահներից՝ Ֆրանսիայից, ԱՄՆ-ից և Ռուսաստանից: