«Այս պատերազմի հովանավորը Թուրքիան է: Թուրքիայի աջակցությամբ է այսօր Ադրբեջանը գնացել պատերազմի: Ալիևն ավելի շատ գործիք է, քան գործող դերակատար: Ալիևը հայտնվել է խորքային փակուղում՝ և՛ իշխանության առումով, և՛ քաղաքական բովանադակության առումով: Եվ այս իրավիճակը նրան դարձնում է հարմար գործիք Թուրքիայի ձեռքին՝ իր աշխարհաքաղաքական նպատակներն իրագործելու համար»,- այս մասին «Առաջին լրատվական»-ի հետ զրույցում ասաց վերլուծաբան Հակոբ Բադալյանը՝ անդրադառնալով ղարաբաղա-ադրբեջանական սահմանագոտում հակառակորդի կողմից սանձազերծված ռազմական լայնամասշտաբ ագրեսիային:
Վերլուծաբանի խոսքով՝ Ալիևը որևէ հույս չունի. «Նա պատերազմը դիտարկում է որպես հուսահատ շանտաժի միջոց. «Նա պարզապես հիմա չունի Թուրքիայի պատերազմի պահանջներին դիմագրավելու հնարավորություն: Այս իրավիճակը օգտագործելով՝ Անկարան փորձում է լուծել ոչ միայն Հայաստանին, այլ ավելի շատ Ռուսաստանին առնչվող իր խնդիրները»:
Քաղաքագետ Ռուբեն Ղևոնդյանի դիտարկմամբ՝ Ալիևը նույնպես ուներ պատրաստվածություն պատերազմի գնալու: «Եվ դա համընկավ Թուրքիայի նկրտումների հետ, և Ալիևը գնաց այս արկածախնդրությանը»,- նշեց քաղաքագետը՝ հավելելով նաև, որ Հայաստանը հիմա շատ ավելի պատրաստ է պատերազմին, քան 2016-ին: Ռուբեն Ղևոնդյանի կանխատեսմամբ՝ հայկական ուժերին կհաջողվի որոշակի հաջողություններ արձանագրել, և այս հարցում վճռական ազդեցություն կունենա նաև Ադրբեջանում հասունացող իշխանափոխության գործընթացը:
Քաղաքագետ Ռուբեն Մեհրաբյանի խոսքով՝ Ադրբեջանն ուզում է ոչ թե հաղթել մեզ, այլ բնաջնջել. «Եվ դրա հեռևանքը կլինի այն, որ ամբողջ հայության ցասումը բռունցքի պես կիջնի նրանց գլխին»:
Մանրամասն՝ տեսանյութում: