«Հելսինկյան 92» նախաձեռնության արցախյան կոմիտեի համակարգող, իրավապաշտպան Կարեն Օհանջանյանն «Առաջին լրատվական»-ի հետ զրույցում ասաց, որ այս պահին Արցախի գրեթե բոլոր բնակավայրերում իրավիճակը լարված է, այդ թվում՝ մայրաքաղաք Ստեփանակերտում. «Կան զոհեր, վիրավորներ, բայց, իմ կարծիքով՝ առաջիկա օրերին իրավիճակը կկայունանա։ Հիմա հանգստյան օրեր են, թեպետ նաև իմ ջանքերի շնորհիվ արտասահմանյան շատ լրատվամիջոցներ ակտիվ ինֆորմացիաներ են տարածում, միջազգային կառույցները կակտիվանան վաղը։ Հիմա կիրակի է, արձագանք չկա, բայց, հավանաբար, վաղվանից կսկսեն ճնշումներ գործադրել, որ Բաքուն դադարեցնի գործողությունները»։
Ինչ վերաբերում է Ստեփանակերտում մարդկանց տրամադրվածությանը, մեր զրուցակիցն ասաց, որ տրամադրությունները տարբեր են՝ կան նաև խուճապային իրավիճակներ, բայց հիմնականում բոլորը հաղթական են տրամադրված. «Ես այն կարծիքին եմ, որ Ադրբեջանը պետք է պատժվի։ Չի կարելի լռել ու կուլ տալ սա։ Եթե հիմա մենք կուլ տանք, ապա մեկ տարուց, կես տարուց հետո նորից նույն իրավիճակն է լինելու։ Հայությունը պետք է համախմբի ու վերջնական հարված տա Բաքվին, ստիպի, որ մեր ուզած պայմաններով խաղաղության համաձայնագիր կնքի»։
