«ԵԱՀԿ Մինսկի խումբն արդեն իսկ հայտարարել է իր դիրքորոշումը ղարաբաղա-ադրբեջանական շփման գծում առկա վիճակի սրացման հետ կապված։ Մոտ ժամանակահատվածում նրանք կներդնեն բոլոր ջանքերը, որպեսզի ռազմական գործողությունները դադարեցվեն»,- «Առաջին լրատվական»-ի հետ զրույցում նման տեսակետ հայտնեց ՌԵԳՆՈՒՄ գործակալության գլխավոր խմբագիր, ռուսաստանցի քաղաքագետ Մոդեստ Կոլերովը։
Մեր զրուցակցի դիտարկմամբ՝ այժմ ուշադրության է արժանանում այն հանգամանքը, որ Ադրբեջանը մեծ քանակությամբ զինտեխնիկա է կորցրել. «Դա որոշակիորեն նոր իրավիճակ է, նոր տվյալներ են։ Եթե 2016 թվականի ապրիլին տեխնիկական այդպիսի մեծ կորուստ չկար, այժմ դա տեսանելի է։ Հիմա պետք է նայենք տարածքային իրավիճակին՝ կա՞ն տեղաշարժեր, թե՞ ոչ։ Խոսում են, որ կա տարածքային առաջխաղացում Ֆիզուլիի շրջանում։ Այն բնակեցված չէ և այնտեղ առաջ շարժվելու համար մեծ ջանքեր չեն պահանջվում։ Հիմա հարցն այն է, թե որտեղ կֆիքսվի շփման գիծը, բայց որ այս սրացումը կհանդարտեցվի՝ դա միանշանակ է»։
Ինչ վերաբերում է Երևանի հնարավոր քայլերին ու մեր այն դիտարկմանը, թե արդյոք սա հարմար պահ է Արցախի անկախությունը ճանաչելու համար, Մոդեստ Կոլերովը պատասխանեց. «Իհարկե, ինչպես 2016 թվականին, այնպես էլ հիմա՝ Հայաստանն ունի բարոյական իրավունք Արցախը ճանաչել որպես անկախ պետություն։ Սա շատ լավ պահ է որոշակի թեստավորում անելու համար, այսինքն` չբավարարվել միայն խոսքերով, անել գործնական քայլեր։ Իլհամ Ալիևը փաստացիորեն հայտարարեց բանակցային գործընթացից դուրս գալու համար, ու հիմա Հայաստանը չունի պատճառ բանակցային գործընթացը չխարխլելու համար չճանաչել Արցախի անկախությունը։ Նման պատրվակ այժմ չկա»։
Խոսելով Մոսկվայի քայլերի մասին, մեր զրուցակիցն ասաց, որ արդեն իսկ գործնական քայլեր են արվում, հեռախոսազրույց է եղել Ռուսաստանի և Թուրքիայի արտգործնախարարների միջև. «Ռուսաստանը, որպես միջնորդ երկիր, կոչ է անում դադարեցնել ռազմական գործողությունները»։