Վրաստանը ուշադիր հետևում է Արցախի իրավիճակին և հույս ունի, որ ընթացող իրավիճակը կկարգավորվի: Այս մասին հայտարարել է Վրաստանի խորհրդարանի նախագահ Արչիլ Տալակվաձեն:
«Ինչպես գիտեք, մեր տարածաշրջանը լի է մարտահրավերներով: Ինչ վերաբերում է կոնկրետ այս դեպքին, ապա, իհարկե, Վրաստանի խնդիրն է և ցանկությունը` որպես Ադրբեջանի և Հայաստանի բարեկամ, առավելագույնս պահպանել կայունությունը, անվտանգությունը և խաղաղությունը: Ուստի, իհարկե, մենք ուշադիր հետևում ենք այս գործընթացներին և հույս ունենք, որ ընթացող իրավիճակը կկարգավորվի, և տարածաշրջանում կվերականգնվի հանգիստ և անվտանգ իրադրությունը»,- ասել է Տալակվաձեն լրագրողներին:
Վրաստանի խորհրդարանի պաշտպանության և անվտանգության հարցերով կոմիտեի ղեկավար Իրակլի Սեսիաշվիլին հայտարարել է, որ Վրաստանը խաղաղության, կայունության կողմնակից է և միջազգային հանրության հետ միասին հակառակորդ կողմերին կոչ է անում դադարեցնել կրակը:
«Մեր տարածաշրջանի անվտանգության համար և մեր երկրի անվտանգության համար շատ վտանգավոր է հակամարտությունը տարածաշրջանում, Արցախում իրադարձությունները առաջացնում են անհանգստություն մեր և միջազգային հանրության շրջանում: Մենք հակառակորդ կողմերին կոչ ենք անում դադարեցնել կրակը, ավելի շատ ժամանակ և էներգիա հատկացնել խաղաղ երկխոսությանը: Ակնհայտորեն մեր համապատասխան ծառայությունները կհետևեն գործընթացներին ամբողջությամբ, կվերլուծեն իրադարձությունները, և եթե խաղաղության և անվտանգության համար մեր աջակցության կարիքը լինի, մենք ակնհայտորեն պատրաստ կլինենք դրան»,- ասել է Սեսիաշվիլին լրագրողներին: