ՄԱԿ-ի ամբիոնից Թուրքիայի նախագահ Էրդողանը հանդես եկավ կոպիտ հակասեմական ելույթով: Այնտեղ կար «կեղտոտ ձեռքի» մասին հիշատակում, որը շոշափում էր սուրբ վայրերը: Թուրքիայի նախագահի հիստերիկ հռետորաբանությունը այս անգամ զարմացրեց անգամ նրանց, ովքեր նախկինում լսել էին իր հայհոյանքները»,- «Առաջին լրատվական»-ի հետ զրույցում նման տեսակետ հայտնեց իսրայելցի հայտնի հասարակական-քաղաքական գործիչ Ավիգդոր Էսկինը:
Թուրքիայի նախագահ Ռեջեփ Թայիփ Էրդողանը ՄԱԿ-ի Գլխավոր ասամբլեայում իր ելույթի ժամանակ դատապարտել է ԱՄԷ-ին և Բահրեյնին Իսրայելի հետ համաձայնագրեր ստորագրելու համար` նրանց «համագործակիցներ» անվանելով:
«Կեղտոտ ձեռքը, որը համարձակվում է դիպչել Երուսաղեմի պարկեշտությանը, որտեղ երեք հիմնական կրոններ են ապրում, գերազանցել է լկտիությունը»,- ասել է Էրդողանը: Նա մեղադրել է Իսրայելին «համագործակիցների միջոցով ամրոցը ներսից գրավելու փորձի մեջ» և ասել, որ Իսրայելի աջակցությունը` Երուսաղեմում դեսպանատներ բացելու համաձայնագրերի և ջանքերի տեսքով, «միայն նպաստել է միջազգային հիմնարար պարամետրերի խարխլմանն ուղղված Իսրայելի ջանքերին»:
Էսկինի դիտարկմամբ՝ հարցն այն է, որ այս տարին Իսրայելի պատմության մեջ ամենահանգիստն էր պաղեստինցիների հետ հակամարտության իմաստով. «Իսրայելն այս պահին Մերձավոր Արևելքի ամենահանգիստ տեղերից մեկն է: Եվ երբ այս պայմաններում Էրդողանը հենց ՄԱԿ-ի ամբիոնից փորձում է աշխարհին Իսրայելի դեմ հանել, անխուսափելիորեն հարցեր են առաջանում նրա ադեկվատության և իրազեկվածության մակարդակի մասին: Ինքը Թուրքիան՝ ի տարբերություն Իսրայելի, ակտիվորեն ներգրավված է արյունոտ հակամարտությունների մեջ և կրում է պարտություն պարտությունի հետևից: Լիբիայում նրա հովանավորյալ Ֆաեզ Սարաջը ստիպված էր հրաժարական տալ իր ժողովրդի շահերը դավաճանելու մեղադրանքների պատճառով: Սիրիայում ևս իրավիճակը Թուրքիայի համար բարդանում է: Իրաքում ևս Էրդողանի կողմնակիցներն ակտիվացել են»:
Մեր զրուցակիցը նաև հիշեցրեց, որ ԱՄՆ Կոնգրեսը որոշում է կայացնում դադարեցնել զենք վաճառել Թուրքիային, իսկ նախագահ Թրամփը որոշում է կայացնում զենք մատակարարել ինքնիշխան հունական Կիպրոսին. «Անկարայում այդ որոշումը պայմանավորում են պրոիսրայելական ակտիվ լոբբիի աշխատանքի հետ: Դրան ավելացրեք Իսրայելի ու Հունաստանի ակտիվ ռազմական համագործակցությունը, որը ներառում է նաև համատեղ զորավարժություններ: Այդպիսով հասկանալի կլինի, թե ինչու է Էրդողանը հանդես գալիս հիստերիկ տոնայնությամբ»:
Ինչպես իրավիճակը կանդրադառնա Թուրքիայի և Իսրայելի երկկողմ հարաբերությունների վրա, դիտարկմանն ի պատասխան, Ավիգդոր Էսկինն ասաց. «Իսրայելական ռազմական հետախուզությունն արդեն պաշտոնապես հայտարարել է, որ Թուրքիան Երուսաղեմի ռազմավարական հակառակորդն է: Առճակատում է ընթանում, որտեղ Թուրքիան կորցնում է իր դիրքերը: Էրդողանը անհաջող փորձ արեց խափանել Իսրայելի և արաբական երկրների միջև խաղաղ համաձայնագրերը: Բայց նրա գործերն ակնհայտորեն լավ չեն ընթանում»։
Մեր հաջորդ հարցին, թե ստեղծված իրավիճակն ի՞նչ հնարավորություններ է բացում Երևանի համար, Էսկինը պատասխանեց. «Ամբողջ աշխարհը պետք է ընդունի, որ Հայաստանին վերաբերել է ոչ բավարար ուշադրությամբ ու հասկացվածությամբ: Բայց չէ՞ որ Հայաստանն արդեն երկար տարիներ զգուշացրել է թուրքական ռևանշիզմի վտանգի մասին: Եկել է ժամանակը, որպեսզի համաշխարհային գերտերությունները՝ ներառյալ Իսրայելը, սկսեն լսել Հայաստանին՝ տեսնելով այսօր նրա ճշմարտացիությունը: Հայաստանն իր կողմից կարող է օգտագործել այս հարմար ժամանակահատվածը սեփական դիրքերի ամրապնդման համար»: