Ընկել ենք շրջապտույտի մեջ: Գլխավոր խնդիրն այն է, որ քաղաքական միտքը անընդհատ պտույտներով գալիս-հանգում է նույն կետին, անընդհատ քննարկվում են անձերը, էպիզոդները: Այս մասին «Առաջին լրատվական»-ի հետ զրույցում ասաց վերլուծաբան Արեգ Քոչինյանը: Նրա դիտարկմամբ՝ բոլոր փոփոխություններն էպիզոդիկ են, հասունանում է հասարակական դժգոհություն, որ համակարգային, ինստիտուցիոնալ փոփոխություններ չեն իրականացվում: «Սա և՛ իշխանության սխալ նախաձեռնությունների հետևանք է, և՛ ընդդիմության կամ ընդդիմություն կոչվող ուժերի անգործության կամ միտումնավոր սխալ գործունեության»,- նշեց վերլուծաբանը:
«Քաղաքացու որոշում» կուսակցության գործադիր մարմնի անգամ Գոռ Հակոբյանը կարևորեց արդար դատական համակարգ ունենալու խնդիրը:
«Հանուն հանրապետության ժողովրդավարության պաշտպանների դաշինք» կուսակցության անդամ Հայկ Այվազյանն անդրադառնալով Սահմանադրական դատարանի շուրջ ստեղծված իրադրությանը, կարծիք հայտնեց, որ նկատվում են առողջացման նշույլներ և նշեց, որ Խունդկարյանի չընտրվելը ցույց տվեց առողջ ուժերի կարողությունը:
Արեգ Քոչինյանը, անդրադառնալով ԲՀԿ-ի, ՀՅԴ-ի և «Հայրենիք»-ի համագործակցությանը և գործունեությանը ընդգծեց, որ դա շոու է, եռյակ դաշինքի նպատակը իշխանությանը հարվածելն է:
«Ծառուկյանը հունիսի 5-ին հայտարարեց 100 տոկոսով Կառավարության կազմը փոխոխելու մասին, իսկ ամսի 10-ին քրեական գործ հարուցելու մասին հայտնի դարձավ. կարծում եմ նախապես իմացել էին քրեական գործի մասին, և սկսել են շոու, որ գործընթացը որպես քաղաքական հետապնդում դիտարկվի»,- նշեց Արեգ Քոչինյանը:
«Մարդիկ պետք է հասկանան, որ կուսակցությունը չեն կարող օգտագործել անձնական շահերի համար, ցավոք, այդ ավանդույթը դեռևս շարունակվում է: Կուսակության գործողությունները պետք է ուղղված լինեն կոնկրետ գաղափարների, ծրագրերի իրականացմանը, ոչ թե սրա կամ նրա շահը սպասարկելուն: Քանի դեռ այս ավանդույթը չենք թոթափել նորմալ քաղաքական համակարգ չենք կարող կայացնել»,- ընդգծեց Գոռ Հակոբյանը:
Ալիևը ՄԱԿ-ում ելույթ ունենալով՝ մտել է հայաստանյան ներքաղաքական տիրույթ՝ պաշտպանելով մեր նախկին նախագահներին՝ համարելով, որ նրանք քաղաքական հետապնդման են ենթարկվում: Անդրադառնալով այս դիտարկմանը՝ Հայկ Այվազյանը նկատեց, որ կարծես թե Ալիևը և Հայաստանի հակահեղափոխական որոշ ուժեր նույն բանի շահառուներն են, նույն շահերն են հետապնդում: «Հայաստանում կա երկու չարիք՝ ԱԱԾ չունենալն ու ԲՀԿ-ն»,- ընդգծեց Հայկ Այվազյանը:
Մանրամասն՝ տեսանյութում:
