Լոռու մարզպետ Անդրեյ Ղուկասյանը բացառում է Վանաձորի քաղաքապետի ընտրություններին իր առաջադրվելը։ Այդ մասին Ղուկասյանը նշեց «Քաղաքացիական պայմանագիր» կուսակցության ընդլայնված նիստից առաջ լրագրողների հետ զրույցում։ Իր առաջադրվելու լուրերի հետ կապված մարզպետը լրագրողներին հակիրճ պատասխան տվեց. «Բացառում եմ»։
Անդրադառնալով մարզպետի պաշտոնից ազատվելու լուրերին՝ Անդրեյ Ղուկասյանը նշեց, որ նման քննարկում չի եղել։ Մամուլում տեղ գտած տեղեկությունների համաձայն՝ նրան կարող է փոխարինել ԱԺ «Իմ քայլը» խմբակցության պատգամավոր Արեն Մկրտչյանը։ Վերջինս լրատվամիջոցների հետ զրույցում, անդրադառնալով այդ հարցին, նշել է. «Անդրեյ Ղուկասյանը շարունակում է պաշտոնավարել որպես Լոռու մարզպետ, ինձ հետ կապված նման քննարկում գոյություն չունի թիմի ներսում»։
Վանաձորում հաջորդ տարի կայանալիք ՏԻՄ ընտրությունները բավականին ուշագրավ են։ Գործող քաղաքապետ Մամիկոն Ասլանյանը, ինչպես հայտնի է, Հանրապետական կուսակցության ներկայացուցիչ է, բայց հեղափոխությունից հետո վերջինս պաշտոնանկ չարվեց, և, ըստ քաղաքում շրջանառվող լուրերի, նրան հաջողվել է գործող իշխանությունների հետ բարյացակամ հարաբերություններ հաստատել։
«Առաջին լրատվական»-ը Ասլանյանից հետաքրքրվեց՝ արդյոք պատրաստվո՞ւմ է հաջորդ տարի առաջադրվել: «Առայժմ վաղ է ապագա պլանների մասին խոսել, որոշումներ կայացնել։ Մենք մեր աշխատանքով ենք զբաղված, երբ որոշում ունենամ վերջնական, կհայտարարեմ»,- պատասխանեց նա։
Ի՞նչ հարաբերություններ ունի քաղաքապետը մարզպետ Անդրեյ Ղուկասյանի հետ՝ մեր հարցին ու դիտարկմանը, թե, ըստ մամուլի հրապարակումների, նրանց հարաբերությունները լարված են, Մամիկոն Ասլանյանը պատասխանեց. «Սովորական աշխատանքային հարաբերություններ են, ոչ ավելին»։
Արդյոք Մամիկոն Ասլանյանին այս ընթացքում խանգարե՞լ է Հանրապետական կուսակցության ներկայացուցիչ լինելը, ի՞նչ խոչընդոտներ են եղել իշխող քաղաքական ուժի հետ հարաբերություններում: «Ես քաղաքապետարանի շենքի ներսում այլ քաղաքական խնդիրներով զբաղված չեմ, քաղաքի հետ կապված հարցերն են ինձ հուզում, այլ բան չի եղել, որ խնդիրներ առաջացած լինեն»,- պատասխանեց Վանաձորի գործող քաղաքապետը։