Դեմոկրատական կուսակցությունից նախագահի թեկնածու Ջո Բայդենը ԱՄՆ-ի գործող նախագահ Դոնալդ Թրամփին գերազանցում է 10 տոկոսով: Այդ մասին վկայում են հարցումների արդյունքները, որոնք անցկացվել են Մարկետի համալսարանի և Քվինիփեքի համալսարանի կողմից: Մարկետի համալսարանի հարցման արդյունքների համաձայն, Բայդենը Թրամփին երկրում գերազանցում է 10 տոկոսային կետով (50 տոկոս առ 40 տոկոս):
Ընդ որում, ներկայիս նախագահի աշխատանքին հավանություն է տալիս հարցվածների 41 տոկոսը՝ 58 տոկոսի դիմաց: Քվինիփեքի համալսարանի հարցումը ցույց է տալիս, որ Բայդենը 52 տոկոս ցուցանիշով առաջատար է Թրամփի 42 տոկոսի համեմատությամբ: Նշվում է, որ ընտրողների 94 տոկոսն արդեն որոշում է ընդունել այն մասին, թե ում օգտին է քվեարկելու:
Այնուամենայնիվ, 5 տոկոսը դեռ կարող է փոխել իր կարծիքը: Միևնույն ժամանակ, ընտրողների շուրջ կեսը հայտարարել է, որ ծրագրում է անձամբ քվեարկել ընտրությունների օրը: Հարցման մասնակիցների միայն մեկ երրորդն է քվեարկելու փոստով կամ հեռակա կարգով: Այն ընտրողների 57 տոկոսը, որոնք հայտարարել են, թե անձամբ են քվեարկելու ընտրությունների օրը, աջակցում է Թրամփին: Քվինիփեքի համալսարանը հարցումն անցկացրել է սեպտեմբերի 17-ից մինչև 21-ը՝ 1302 հնարավոր ընտրողների շրջանում, դրա սխալանքը կազմում է 2,7 տոկոսային կետ: Մարկետի համալսարանի հարցումն անցկացվել է սեպտեմբերի 8-ից մինչև 15-ը՝ 1357 հավանական ընտրողների շրջանում, հնարավոր վիճակագրական սխալանքը կազմում է 3,6 տոկոսային կետ՝ հաղորդել է «Ինտերֆաքս»-ը:
