ԲՀԿ պատգամավոր Միքայել Մելքումյանը հրապարակում է արել Ֆեյսբուքի իր էջում՝ Հայաստանի իշխանություններին առաջարկելով Ռուսաստանից վերցնել 1 մլրդ ԱՄՆ դոլարին համարժեք միջպետական վարկ՝ ռուսական ռուբլով, հաշվի առնելով ՀՀ-ում տնտեսական անկման ցուցանիշները: «Մի քանի օր առաջ Բելառուսը ստացավ նմանատիպ վարկ՝ շուրջ 1,5 մլրդ ԱՄՆ դոլարի չափով: Հայաստանի Հանրապետության տնտեսություն պետք է ներարկել անհրաժեշտ ծավալի ֆինանսական ռեսուրսներ: Դրան այլընտրանք չկա, որովհետև շատ արագ կարող է ստացվել միայն Ռուսաստանի Դաշնությունից»,- գրել է պատգամավորը: Միքայել Մելքումյանը նաև հարցադրում է արել, թե ԵԱՏՄ պետություններից ինչո՞ւ է միայն Հայաստանի հետ փակ մնացել ՌԴ-ի սահմանը։
Քաղաքագետ Ռուբեն Մեհրաբյանի կարծիքով՝ սա սադրիչ հայտարարություն է, որը Հայաստանի շահերին ուղղակիորեն դեմ է: «Պարզապես որոշ մարդիկ փորձում են միջնորդի դեր ստանձնելով լավամարդ դուրս գալ արտաքին ուժերի մոտ։ Սա դատապարտված է անհաջողության։ Այդ մարդիկ թող շարունակեն իրենց լյուստրացիայի ենթարկել, ես ավելացնելու ոչինչ չունեմ»,- «Առաջին լրատվական»-ի հետ զրույցում ասաց նա։
Ինչ վերաբերում է Ռուսաստանի կողմից մեզ համար սահմանը չբացելու հանգամանքին, Ռ. Մեհրաբյանն ասաց. «Ռուսաստանից մենք որևէ պաշտոնական հայտարարություն չենք լսել սրա հետ կապված, ուստի ես ձեռնպահ կմնամ որևէ բան ասելուց։ Ի վերջո, համավարակը դեռ չի դադարել, և ամեն պետություն յուրովի է կարգավորում իր սահմանային ռեժիմը, այդ թվում՝ և՛ Հայաստանը, և՛ Ռուսաստանը։ Շահարկումների համար պարարտ հող տեսնողները թող հանգիստ նստեն իրենց տեղները»,- եզրափակեց մեր զրուցակիցը։
ԳԽ պատգամավոր Ազատ Արշակյանի կարծիքով՝ Ռուսաստանից վարկ կարելի է վերցնել չտալու պայմանով: «Բելառուսը հենց չտալու պայմանով է վերցրել։ Իսկ ընդհանրապես գումար հենց այնպես վերցնել ու խժռել, այն նետել կոյուղի՝ չի կարելի։ Վարկ վերցնել՝ նշանակուամ է վերցնել տեխնոլոգիա, արտադրական համալիր վերցնել, որը կբազմապատկվի՝ և՛ գումարը կվերադարձվի, և՛ Հայաստանին շահույթ կմնա և նաև՝ արտադրական ենթակառույց։ Ես մեր տնտեսական հարաբերությունները գործընկերների հետ այդպես եմ պատկերացնում։ Մեզ պետք է արտադրական ենթակառուցվածք, ատոմակայան։ Այսինքն՝ ինքը պետք է լինի գնորդը, բերի 1.5 միլիարդով Հայաստանում արտադրական ձեռնարկություն հիմնի, որը ենթադրում է, որ, օրինակ, Պոլիտեխնիկ ինստիտուտը կսկսի դրա համար կադրեր պատրաստել»,- «Առաջին լրատվական»-ի հետ զրույցում ասաց նա։
Մեր զրուցակցի դիտարկմամբ՝ մնացած բոլոր խոսակցությունները քաղաքական զազրախոսություններ են. «Դա իրենց կազմակերպությանը սազում է, պետք չէ դրա վրա ուշադրություն դարձնել»։