Խաղողի մթերումը հիմնականում բնականոն է ընթանում, բայց մթերման գործընթացի հետ կապված խնդիրներ են առաջացել. դատելով արձագանքներից՝ կա դժգոհություն և որոշակի լարվածություն: Այս խնդրին ամենաշատը բախվում են Արարատի և Արմավիրի մարզերը, քանի որ այնտեղ է գտնվում խաղողի այգիների մեծ մասը:
Արմավիրի մարզում խաղողի մթերման խնդիրները հիմնականում պայմանավորված են գնային քաղաքականությամբ, թե ինչու է ցածր գինը: Թեմայի շուրջ «Առաջին լրատվական»-ի հետ քննարկման ժամանակ ասաց Արմավիրի մարզպետ Համբարձում Մաթևոսյանը: Նա նշեց, որ օբյեկտիվ հանգամանքներ կան, որոնք պետք է ուսումնասիրել: «Պետք չէ լարվածություն ստեղծել, քանի որ դա բացասաբար կազդի շուկայական հարաբերությունների վրա, և խնդիրը շղթայաձև կշարունակվի: Որոշակի լարվածության պատճառով ֆերմերներն ավելի շուտ են հավաքում խաղողը, և նմթերման գործընթացի ժամանակ պարզում է, որ շաքարի պարունակությունը շատ ցածր է, իսկ դա ազդում է որակի և գնի վրա»,- նշեց մարզպետը՝ հավելելով, որ ըստ պայմանագրերի՝ մթերողն իրավասու է չընդունել այդ խաղողը:
Արարատի մարզպետ Գարիկ Սարգսյանը նշեց, որ ակնկլավում էր այս տարի խաղողի առատ բերք ստանալ և այդպես էլ եղավ: «Ունենք բերքի աճ՝ նախորդ տարվա համեմատ 20-30 տոկոս, որը, սակայն, իր հետ խնդիրներ է բերում: Կորոնավիրուսի համավարակի պայմաններում վերջնական արտադրանքի՝ գինու, կոնյակի, օղու իրացման և արտահանման հետ կապված խնդիրներ են առաջացել շուկայում, և մթերող ձեռնարկությունները պատճառաբանում են, որ տարրաները դատարկ չեն, տեղ չունեն մեծ քանակությամբ խաղող մթերելու համար: Կան մթերող ընկերություններ, որոնք կրճատել են պայմանագրերը՝ օբյեկտիվ պատճառներով»,- նշեց Գարիկ Սարգսյանը՝ հավելելով նաև, որ կան ընկերություններ, որոնք կառավարությունից օժանդակություն ստանալու դեպքում հնարավորություն կունենան ավելի մեծ ծավալով բերք մթերել:
Համբարձում Մաթևոսյանի հավաստմամբ՝ 2019 Արմավիրի մարզի համար բացառիկ տարի է եղել. «Ունենք ներդրումների աճ, 2-3 տարի անց բերքն ավելի շատ է լինելու»:
Գյուղատնտեսական չօգտագործվող հողատարծքները գերակշռող մաս են կազմում: Գարիկ Սարգսյանի խոսքով՝ Արարատի մարզում մշակվում է հողատարծքների 27 տոկոսը. «Արարատյան դաշտի համար ամենամեծ խոչընդոտը ոռոգման ջուրն է: Մարզում հիմնվել են մոտ 45 հա ինտենսիվ այգիներ: Նաև խաղողի նոր այգիներ են հիմնվել՝ ավելի քան 135 հա, դա պայմանավորված է նաև նրանով, որ կորոնավիրուսի համավարակի պատճառով արտագնա աշխատանքի մեկնողները մնացին և մշակեցին իրենց հողերը»:
Մարզպետները վստահեցնում են՝ Կառավարությունը խոստացել է, որ բոլորի մշակած խաղողը կմթերվի, դաշտում չի մնա: Այլ հարց է, թե ինչ գնով և երբ:
Մանրամասները՝ տեսանյութում: