«Առաջին լրատվական»-ի զրուցակիցն է ԱԺ «Իմ քայլը» խմբակցության ղեկավար Լիլիթ Մակունցը:
– Տիկին Մակունց, մի քանի օր է՝ քննարկվում և քննադատվում է Արարատ Միրզոյանի կարգադրությամբ ԱԺ նախագահի, ԱԺ փոխնախագահների և պատգամավորների պարգևատրումը. ԱԺ նախագահը պարգևատրվել է 900 հազար դրամով, պատգամավորները՝ 500 հազար դրամով: Մեկուկես տարի է՝ խոսվում է պարգևավճարներից, և հասարակությունը բուռն է արձագանքում, իշխանությունն ինչո՞ւ է գնում այն ճանապարհով, որին դեմ է հասարակությունը:
– Շուրջ 1,5 տարի, եթե ոչ ավելի անընդհատ անդրադառնում ենք պարգևատրումների թեմային, և իմ դիրքորոշումները, պատկերացումները ես ներկայացրել եմ. մնում եմ այն համոզման, որ առավել արդարացի ճանապարհը այն մեխանիզմն է, որը դեռ 1,5 տարի առաջ կառավարությունում քննարկվում էր, որի համաձայն՝ պետական պաշտոնյաներին կտրամադրվեր պարգևավճար: Թե ինչ փուլում է այդ գործընթացը, ես չեմ կարող ասել, բայց իմ դիրքորոշումները անընդհատ ներկայացրել եմ:
– Արդյո՞ք սա խոցելի չի դարձնում իշխանություններին:
– Իմ մոտեցումն այն է, որ արդարացի ճանապարհը հստակ չափորոշիչներ մշակելու միջոցով է, որն այս պահին մեր դաշտում չէ:
– Օրենսդրականությա՞ն հարց եք տեսնում այս խնդրում, օրինակ՝ աշխատավարձերի բարձրացումը կտա՞ այս խնդրի լուծումը: Եվ արդարացի՞ եք համարում այն, որ պատգամավորը տարվա ընթացքում մի քանի օր է ներկայացել, իր աշխատանքով երբևէ չի փայլել, և բացի բարձր աշխատավարձից՝ ստանում է նաև պարգևատրում, որովհետև պարգևավճարների մասին որոշումը տարածվում է բոլոր պատգամավորների վրա:
– Չափորոշիչները հենց դրա մասին են, որոնցով հստակ կլինի, թե ինչ աշխատանքի համար են ստանում պարգևատրումներ:
– Հոկտեմբերի 8-ին ԲՀԿ-ն, ՀՅԴ-ն և «Հայրենիք» կուսակցությունը հանրահավաք են հրավիրել, օրակարգը հստակ չէ, հայտնի չէ վարչապետի կամ կառավարության հրաժարականի պահանջ լինելու է, թե ոչ, այնուամենայնիվ, մտահոգո՞ւմ է սա իշխանությանը, թե՞ ոչ: Մյուս կողմից էլ նշվում է, որ Գագիկ Ծառուկյանը դժվար թե հասցնի մասնակցել հանրահավաքին, քանի որ մինչ այդ կկալանավորվի:
– Ընդդիմության իրավունքն է իր նախընտրած, սահմանադրորեն ընդունելի ձևաչափով իրականացնել քաղաքացիների հետ հանդիպումներ, այդ թվում՝ նաև հանրահավաքի տեսքով: Թե ուղերձներն ինչպիսին կլինեն, հանդես են գալու կոչով, թե ոչ, ներկայացնելու են ՀՀ զարգացման իրենց տեսլականը, թե ոչ, մենք՝ բոլորս կլսենք, անհրաժեշտության դեպքում կարձագանքենք, հետևություններ կանի ՀՀ քաղաքացին:
– Բացառո՞ւմ եք, որ այդ ուժերը կկարողանան հաջողության հասնել և իշխանությանը պարտադրել արտահերթ խորհրդարանական ընտրությունների իրենց պահանջը:
– Եթե ես իմ տեսակետը ներկայացնեմ, դուք կհամարեք չափազանց սուբյեկտիվ: Կան հստակ ազդակներ և ցուցիչներ նրանց հնարավորությունները գնահատելու համար: Այդ ցուցիչներից են, օրինակ, հարցումները, որոնց տվյալները վկայում են՝ կա նման հիմք, թե չկա: Առնվազն կարելի է հաշվի առնել այդ հանգամանքը:
– Ծառուկյանի հնարավոր կալանավորման հետ կապված ի՞նչ կարող եք ասել: Ամիսներ առաջ ԲՀԿ-ն անընդհատ պնդում էր, որ իրենց նկատմամբ քաղաքական հետապնդում եք սկսել և ընտրել եք Ծառուկյանին կալանավորելու միջոցը:
– Վերջերս արդիական է դարձել ցանկացած պրոցեսին տալ քաղաքական հետապնդում որակումը: Պարզապես պետք է համակերպվենք այն իրավիճակի հետ, որ Հայաստանում իրավական գործընթացները զատվում են քաղաքական գործընթացներից: Հանրահավաքներ կազմակերպելն իրենց իրավունքն է, բայց դա որևէ ազդեցություն չի ունենա իրավական գործընթացների վրա: Թե ինչպես են ընթանում իրավական գործընթացները, որքանով որ հրապարակային են, բոլորս իրազեկվում ենք, իսկ թե ինչպիսի վերջնարդյունք կլինի, թերևս սպասենք և կտեսնենք:
– Անդրադառնանք «Իմ քայլ»-ում տիրող իրավիճակին: Մամուլը չի դադարում գրել այն մասին, որ ձեր խմբակցությունում կա խնդիր, և չի բացառվում, որ մի քանի պատգամավոր վայր կդնի մանդատը: Ջուլֆալակյանի դեպքում անակնկալի եք եկել, այդպիսի անակնկալների սպասո՞ւմ եք այս փուլում, թե՞ ոչ:
– Որևէ հարցի վերաբերյալ մեզ մոտ երբևէ չի լինում միասնական դիրքորոշում, և դա շատ լավ է: Ցանկացած հարց մեր խմբակցությունում բազմաշերտ և բազմակողմանի քննության առարկա է դառնում: Որքան էլ տարբեր որակավորումներ լինեն, թերահավատություն կամ այլ մոտեցումներ, մեր խմբակցությունում այսպիսին է իրավիճակը, և մենք խրախուսում ենք դա և կարծում ենք, որ դա է ճիշտ ճանապարհը: Կարևորն այն է, որ ի վերջո մենք կարողանում ենք բազմաշերտ, բազմակողմ մոտեցումներով գալ-հանգել լուծումների, եզրահանգումների: Ինչ վերաբերում է բացառելուն, որ մինչև 23թ. խմբակցությունից որևէ պատգամավոր մանդատը վայր կդնի, իհարկե, ես չեմ կարող բացառել: Ինչպե՞ս կարող եմ ես նման բան բացառել, եթե յուրաքանչյուր պատգամավոր ինքն է որոշում՝ այն մանդատը, այն քվեն, որ տվել է քաղաքացին, ցանկություն ունի մինչև վերջ ծառայեցնելու, թե ոչ: Իսկ այն պատգամավորները, որոնց մանդատը վայր դնելու առնչությամբ ասեկոսեներ, լուրեր կային, հերքել են այդ լուրերը, իսկ ովքեր չեն հերքել, կա՛մ իրենք հայտարարությամբ հանդես կգան, կա՛մ կարող եք այդ հարցն ուղղել իրենց:
– Իսկ այդ մասին քննարկում ունեցե՞լ եք իրենց հետ:
– Մենք բոլորի հետ ունենում ենք աշխատանքային տարբեր քննարկումներ:
– Մանդատ վայր դնելու մասին ցանկություն հնչե՞լ է, թե՞ ոչ:
– Անուններ չտամ, բայց երբ որ ինչ-որ մեկը բորբոքված ինչ-որ բան է ասում, կարող են հնչել նաև կեսկատակ արված արտահայտություններ: Չկա հարց, որն անհանգստացնի, հուզի պատգամավորներին, և դա չքննարկվի, պատգամավորական մանդատը վայր դնելու առումով, եթե պատգամավորները ցանկություն են ունենում քննարկելու, ապա դա տեղի է ունենում, իսկ մանրամասների մասին, եթե անհրաժեշտություն լինի, իրենք անձամբ կիրազեկեն հանրությանը:
Հարցազրույցն ամբողջությամբ՝ տեսանյութում:
