Ադրբեջանի քայլերը միտված են Ռուսաստանին տրամադրելու Հայաստանի դեմ, որ Ռուսաստանը փորձի ազդեցություն գործել Հայաստանի վրա, և իրականացվի որևէ գործողություն, որը կդիտվի որպես զիջող քայլ Հայաստանի կողմից, և Ալիևը, գտնվելով ներքաղաքական բարդ պայմաններում, դա կարողանա ներկայացնել որպես մեծ հաջողություն, ինչպես որ արեց 2016թ: «Առաջին լրատվական»-ի հետ զրույցում այս կարծիքը հայտնեց Երևանի մամուլի ակումբի նախագահ Բորիս Նավասարդյանը:
Նրա խոսքով՝ Ադրբեջանը փորձում է օգտագործել հայ ռուսական հարաբերությունների թույլ երկխոսության հարթակները. «Ալիևը հաշվի չի առնում, որ որքան էլ թույլ լինեն երկխոսության հարթկաները Մոսկվայի և Երևանի միջև, ամենակարևոր գործոնն այն է, որ ռազմական համագործակցության ոլորտում կա երկխոսություն, և այստեղ հակասություններ չկան»:
Անդրադառնալով դիտարկմանը, որ պատերազմները սովորաբար ուղեկցվում են նախապատրաստական աշխատանքներով, այդ թվում նաև տեղեկատվական քարոզչությամբ, «Օրբելի» կենտրոնի փորձագետ Նարեկ Մինասյանը նշեց, որ տեղեկատվական բաղադրիչը կարևոր է, բայց բավարար չէ: «Ցանկացած գործողություն, կլինի մեծ մասշտաբի, թե տեղական մակարդակի էսկալացիա, պայմանավորված է մի շարք գործոններով, կատարվում են հաշվարկներ՝ ներառելով տնտեսական, ներքաղաքական, սոցիալական և այլ գործոններ: Պետք է հաշվի առնել, որ Ղարաբաղյան հիմնախնդիրն ազդեցիկ գործոն է նաև Ադրբեջանի վարչակարգի պահպանման տեսանկյունից: Տարիներ շարունակ քարոզչություն է իրականացվել, որ հիմնախնդիրը պետք է լուծվի Ադրբեջանի շահերից բխող փուլային տարբերակով: Հուլիսյան իրադարձությունները բարդ դրության մեջ դրեցին Ադրբեջանի իշխանություններին: Նրանք սեփական հանրության մոտ իրենց դիրքերն ամրապնդելու համար տարածում են ադրբեջանական «հաղթական բանակի» միֆը: Ադրբեջանի համար տեղեկատվական ֆոնի ձևավորումը առաջնահերթ նշանակություն ունի թե՛ ներքին, թե՛ արտաքին պատճառներով»,- նշեց փորձագետը:
Մեր զրուցակիցների դիտարկմամբ՝ ներքաղաքական որոշ դերակատարներ ստեղծում են պարարտ հող, որ Ադրբեջանը թիրախավորի Հայաստանը:
Մանրամասն՝ տեսանյութում:
