Արտահանումների ակտիվ սեզոն է, մեծ թափով արտահանում է տեղի ունենում: Կորոնավիրուսի համավարակով պայմանավորված՝ արտահանումները 4-5 տոկոսով նվազել են, բայց հանքահումքային նյութերի արտահանումն աճել է 16-17 տոկոսով: Այս մասին «Առաջին լրատվական»-ի հետ զրույցում ասաց Արտահանողների միության նախագահ Րաֆֆի Մխչյանը:
«Կորոնավիրուսի ամենամեծ ազդեցությունը օդանավով տեղափոխվող արտահանումների վրա է եղել: Արտահանումների նվազումը հենց օդային արտահանումներ չիրականացնելու հետ է կապված… Մենք չպետք է հույսը դնենք միայն Լարսի վրա: Խնդիրներ կան, որ պետք է լուծվեն, արտահանման այլընտրանքային ճանապարհներ են պետք»,- նշեց Րաֆֆի Մխչյանը:
«Մենք ունենք երկու ուղղություն նոստալգիկ արտահանում և միջազգային արտահանում: Հայաստանից արտահանվող ապրանքների 90 տոկոսը հայ համայնքների, հայ սպառողների համար է: Արտահանողներն այդպես չպետք է մտածեն, պետք է արտահանվեն այնպիսի ապրանքներ, որոնք ուրիշներն էլ են օգտագործում, և պետք է արտահանել որակյալ ապրանքներ»,- ասաց Արտահանողների միության նախագահը:
Րաֆֆի Մխչյանն ընդգծեց, որ հայ արտահանողներն այսօր Ռուսաստանում հայտնվել են ամոթալի վիճակում. «Տավուշյան դեպքերից հետո մեզ դուրս շպրտեցին Ռուսաստանի ադրբեջանական շուկաներից: Սա մեզ համար դաս պետք է լինի: Պետությունը պետք է մտածի սրա մասին: Մենք էլ պետք է Ռուսաստանի մայրաքաղաքում՝ Մոսկվայում ստեղծենք մի հարթակ, ոտեղ կկարողանանք վաճառել մերապրանքները: Պետք է պետական հովանավորչություն: Սակայն մինչև հիմա ոչ ոք մատը մատին չի տվել»:
Մանրամասն՝ տեսանյութում:
