Լուրեր
Հեղափոխական պառլամենտը նպաստեց ՍԴ-ն հանցավոր ռեժիմով համալրելուն․ Բախումն անխուսափելի է
  • 19:21
  • 2020-09-23
  • Դիտումներ՝ *

Սահմանադրական դատարանն այսօր պետք է նախագահ ու փոխնախագահ ընտրեր։ Սակայն ընտրությունն այսօր տեղի չի ունեցել, նիստի ընթացքում ընթացիկ երկու հարց է քննարկվել։ Ընտրությունը կկատարվի վաղը։

Դեռ տեղեկություն չկա, թե ովքեր են առաջադրվել, ի՞նչ սպասելիքներ ունեք․ «Առաջին լրատվական»-ի հարցին իրավապաշտպան Նինա Կարապետյանցը պատասխանեց․ «Թեպետ որոշ մարդիկ համարում են, որ խնդիրը լուծված է, ճգնաժամը լուծված է, բայց, անկեղծ ասած՝ այս Սահմանադրական դատարանից ես որևիցե սպասելիք չունեմ, ակնկալիք չունեմ, որովհետև, իմ խորին համոզմամբ՝ վերջին երեք դատավորների համալրումով տեղի ունեցավ Սահմանադրական դատարանի փոխանցումը հանցավոր ռեժիմին։ Ես դրա մասին բազմիցս ասել եմ ու պնդում եմ։ Անկեղծ ասած՝ ինձ համար էական էլ չի, թե ով կլինի նախագահը կամ փոխնախագահը, որովհետև դրանք մեծամասամբ արարողակարգային գործողություններ են՝ ադմինիստրատիվ աշխատանք է, և այն այնքան էլ էական չի։ Ես կարծում եմ, որ այս համակարգում ոչինչ չփոխվեց, և չարժեր այն չարքաշ աշխատանքը, որպեսզի մենք արդյունքում ունենայինք այսպիսի Սահմանադրական դատարան»։

Իսկ փաստաբան Գևորգ Դավթյանն ասաց․ «Ճիշտ է՝ ամեն ինչ կախված է Սահմանադրական դատարանի հետագա աշխատանքից, սակայն, շատ անգամ, որպեսզի մենք տեսնենք դրականը, ստիպված ենք լինում համեմատել նախորդ Սահմանադրական դատարանի հետ։ Այսօր անգամ չգիտենք, թե ովքեր են լինելու նախագահի կամ փոխնախագահի թեկնածուները։ Նախորդ իշխանության ժամանակ մենք դեռ ամիսներ առաջ գիտեինք, թե ով պետք է լիներ Սահմանադրական դատարանի նախագահը, և ով պետք է լիներ փոխնախագահը։ Այդ առումով եթե նայենք, ապա, կարծես թե, այստեղ կա առաջընթաց։ Բայց ես եթե ասում եմ՝ լավ է, ապա դա չի նշանակում, որ դա այն է, ինչ մենք ցանկանում ենք։ Մենք ցանկանում ենք շատ ավելին, և դա բնական ու օբյեկտիվ է»։

 

  • Դիտումներ՝ *