Երեկ ՀՀ վարչապետ Նիկոլ Փաշինյանը ներկայացրել է մինչև 2050թ. Հայաստանի զարգացման ռազմավարությունը, որն արդեն քաղաքական, մասնագիտական շրջանակներում դարձել է ակտիվորեն քննարկվող թեմա՝ բավականին տարակարծիք ընկալումներով:
Որքանո՞վ է իրատեսական վարչապետի տեսլականը: Թեմայի շուրջ «Առաջին լրատվական»-ի հետ քննարկմանը մասնակցեցին պատմաբան Զոհրաբ Գևորգյանը, կառավարման հարցերի փորձագետ Սերոբ Անտինյանը և ժողովրդագիր Արտակ Մարկոսյանը:
Սերոբ Անտինյանի դիտարկմամբ՝ նման դիսկուրսի անհրաժեշտությունը վաղուց էր հասունացել, նույնիսկ ուշացած է: «Եթե հեղափոխությունը նկատի ունենանք որպես նոր մեկնարկ պետության և հասարակության, ինչպես նաև արժեքային կողմնորոշիչների համար, ապա արդեն իսկ հասունացել էր ուղենիշները նշելու պահը»,- նշեց կառավարման հարցերի փորձագետը:
«Այս փաստաթուղթը գրված է կյանքի կոչվելու համար: Պետք է հասկանալի լինի՝ նպատակները ֆիքսվել են ապրիորի՞, թե՞ կոնկրետ ժամանակահատվածում պետք է իրագործվեն: Խնդիրն այն է, որ ռազմավարությունների առումով ունենք մեծ բաց»,-նշեց Սերոբ Անտինյանը:
Արտակ Մարկոսյանի դիտարկմամբ՝ մինչև 2050թ. տեսլականը վատը չէր: «Այո՛, մեզ պետք է բնակչություն, եթե ուզում ենք այս տարածաշրջանում մնալ որպես անկախ պետություն: Բայց հարց է՝ արդյո՞ք մենք ունենք 5 միլիոն դառնալու հնարավորություն, բնակա՞ն, թե՞ մեխանիկական ճանապարհով պետք է լուծում տանք այդ հարցին: Բնական աճի տեմպերը գնալով նվազում են, և ըստ կանխատեսումների՝ 2025թ. հետո մահվան թվերը կգերազանցեն ծնունդների թվին: Ե՛վ մեխանիկական, և՛ բնական աճի տարբերակները պետք է իրականացվեն»,- նշեց Արտակ Մարկոսյանը՝ հավելելով, որ այդ առումով անհրաժեշտ է վերլուծություններ և կախատեսումներ անել:
Զոհրաբ Գևորգյանի դիտարկմամբ՝ մեր իրականությունը տնտեսական տրանսֆորմացիաների չի ենթարկվել, և մեր հասարակությունը դեռևս ունակ չէ ընկալելու տնտեսական ուղերձները:
«Ես չեմ տեսնում կառավարության ոճայնություն: Երբ որ ուղերձները գալիս են մի կետից, նորից կառավարումը ընկալվում է որպես բուրգային կառավարում: Ինչքան էլ ասեն հեղափոխություն, միևնույն է, պատմական տեսանկյունից նորից անձնավորված կառավարման նշաններ կան. դա կարող է հասարակության մեջ ենթագիտակցորեն հետընթացայնության ընկալում առաջացնել»,- ընդգծեց Զոհրաբ Գևորգյանը:
Մանրամասները՝ տեսանյութում: