Ռուսաստանցի ընդդիմադիր գործիչ Ալեքսեյ Նավալնին, որը շարունակում է վերականգնողական կուրսը կոմայից դուրս գալուց հետո, կնոջը՝ Յուլյային ուղղված նոր գրառում է հրապարակել: Նա պատմել է, թե ինչպես է կինն օգնել իրեն գիտակցության գալ:
Նավալնին հիշեցրել է, որ օգոստոսի վերջին իրենք պետք է նշեին համատեղ կյանքի 20-ամյակը, բայց տոնը չստացվեց, քանի որ այդ ժամանակ նա արդեն կոմայի մեջ էր: Դրանից հետո, արդեն Բեռլինի «Շարիթե» կլինիկայում, Յուլիան մշտապես հերթապահել է ամուսնու հիվանդասենյակում և խնամել նրան. երգել է, երաժշտություն միացրել, ինչ-որ բան պատմել: Նավալնին խոստովանել է, որ ոչինչ չի հիշում այդ իրադարձություններից, բայց սարքերից անջատվելուց հետո իր առաջին հիշողությունն այն էր, թե ինչպես էր սպասում կնոջ հայտնվելուն:
«Ոչ մեկին չեմ ճանաչում, չեմ հասկանում, թե ինչ է կատարվում… Միայն սպասում եմ, թե երբ է նա գալու…»,- գրել է Նավալնին:
Նրա խոսքով, նա անմիջապես հասկանում էր, որ Յուլիան եկել է. «Երբ նա կողքիս է, հիմար հալյուցինացիաները նահանջում են… Հետո նա հեռանում է, և ես տխրում եմ, և նորից սկսում եմ սպասել նրան»:
Ընդդիմադիրը ենթադրել է, որ իր նկատած ֆենոմենը գիտական բացատրություն ունի, այն է՝ ուղեղը սկսել է դոֆամին արտադրել, երբ նա ճանաչել է կնոջ ձայնը, ուստի նրա ներկայությամբ իրեն ավելի լավ է զգացել: Այնուամենայնիվ, նա հավելել է, որ անկախ գիտական տեսություններից, նա հասկացել է իր փորձից, որ «սերը բուժում է և կյանքի վերադարձնում»:
«Յուլիա, դու փրկեցիր ինձ,- եզրափակել է Նավալնին: Թող սա գրվի նեյրոկենսաբանության դասագրքերում»:
Առանձին գրառմամբ ընդդիմադիրը մեկնաբանել է Ռուսաստանի իրավապահ մարմինների աշխատակիցների աշխատանքը, որոնք, ըստ հաղորդումների, նախաքննություն են անցկացնում: Մասնավորապես, Նավալնին պահանջեց վերադարձնել իր հագուստը, որը նա կրել է հոսպիտալացման ժամանակ՝ նախքան գերմանական կլինիկա տեղափոխվելը: