Օրերս հանրությունն ականատես եղավ վարչապետ Նիկոլ Փաշինյանի և ԲՀԿ առաջնորդի ոչ քաղաքական բառապաշարով երկխոսության։
Իշխանությունն ու «Բարգավաճ Հայաստանը» միմյանց «պատերա՞զմ» են հայտարարել․ «Առաջին լրատվական»-ի հարցին «Ժողովրդական համախմբում» նախաձեռնության համախմբող Սուրեն Պետրոսյանը պատասխանեց․ «Ինչպես Վազգեն Սարգսյանն էր ասում՝ անկախությունը բացարձակ արժեք է և, իհարկե, անսակարկելի։ Հետևաբար՝ բոլոր այս երևույթները պետք է դիտարկել հենց այս համատեքստում։ Անկախություն՝ թե ինչպես ենք մենք այն ձեռք բերել, ինչ բախտ է վիճարկվել, որ մենք ապրում ենք այս ժամանակահատվածում, երբ ունենք պետականություն, և ինչպես պետք է մեր պոտենցիալն իրականացնենք։ Թերևս, ձեր հարցը պետք է այս տիրույթում դիտարկել։ Մենք շատ հաճախ, երբ խոսում ենք ժողովրդավարությունից, մատնանշում ենք հիմնականում կոռուպցիան։ Նշում ենք, որ համակարգային կոռուպցիան վերանում է․ դա այդպես է, թե ոչ, չեմ կարող ասել, բայց, ամեն դեպքում, կոռուպցիան ժողովրդավարության կարևոր նախապայմաններից մեկն է, բայց չափիչ չէ, և այն ոչինչ չի ասում ժողովրդավարության մասին։ Պետք է նշեմ, որ ժողովրդավարության կարևորագույն պայմաններից մեկը հանդուրժողականությունն է։ Ոչ թե այլասերված երևույթների նկատմամբ հանդուրժողականությունը, ինչպես շատ անգամ մարդիկ շփոթում են, այլ պետք է լինի քաղաքական հանդուրժողականություն։ Իսկ վարչապետի ու ԲՀԿ առաջնորդի երկխոսությունը վկայում է, որ մենք չունենք քաղաքական մշակույթ, այլ որ ամենավատն է և վնասում է ժողովրդավարությանը, որը մենք ունենք, դա պատերազմն է առանց կանոնների։ Սա ժողովրդավարության և, ընդհանրապես, պետության հիմքերը խարխլող ամենավատ երևույթն է»։
Իսկ վերլուծաբան Արեգ Քոչինյանն ասաց․ «Մենք այս տարի նշում ենք Անկախության 29-րդ տարեդարձը։ Ես գտնում եմ, որ մենք այսօրվա հետ կապված պետք է վերաիմաստավորման որոշակի քայլեր անենք։ Այսինքն՝ այդ օրը ոչ թե պետք է միայն օրացույցում կարմիրով նշվի, այլ այդ օրը պետք է բոլորիս ընտանիքներում մեծ տոնախմբություն կազմակերպվի։ Այն պետք է տարվա մեջ լինի մեր ամենամեծ իրադարձությունը, որովհետև այն մեր ժողովրդի դարավոր իղձերի մարմնացումն է։ Ինձ թվում է՝ մենք բավական շատ գործ ունենք այս տոնի իմաստավորման ուղղությամբ»։
Մանրամասները՝ տեսանյութում։