Ազգային ժողովրդավարական բևեռը զավեշտալի է համարում իշխանության ներկայացուցիչների այն պնդումները, թե Սահմանադրական դատարանի ճգնաժամի հարցը լուծված է։
«Առաջին լրատվական»-ի հետ զրույցում բևեռի ներկայացուցիչ Վահագն Ավագյանն ասաց. «Առաջին հերթին պետք է հասկանալ, թե այդ ճգնաժամի էությունն ինչում է կայանում, ինչու ենք մենք այն համարում ճգնաժամ։ Հարցն այն էր, որ նախորդ ռեժիմից ժառանգած սահմանադրական կարգի տապալման մեջ մեղսակցություն ունեցող դատաիրավական ամբողջ համակարգը հայ ժողովրդի իշխանության բռնազավթմանը աջակցած մի հանցավոր համագործակցություն է իրենից ներկայացնում։ Այն իր բոլոր ռեսուրսներով, այդ թվում՝ հայ ժողովրդից յուրացրած պետական լծակների միջոցով, հայ ժողովրդի արտաքին և ներքին մարտահրավերներին պատասխան տալու հետ որևէ առնչություն չունի։ Ինքն իր կյանքն ունի, իր կյանքի նպատակը իշխանությունը զավթած խունտայի իշխանությունը երկարաձգելն է եղել 30 տարիների ընթացքում, և երբ 2018 թվականի համաժողովրդական ապստամբությամբ ժողովուրդը մերժեց այդ համակարգը և ցանկություն հայտնեց ազատագրվելու այդ համակարգից, ստեղծելու ինքնիշխան պետական համակարգ ու ապրելու ներքին համերաշխությամբ ու նաև արտաքին մարտահրավերներին ադեկվատ արձագանք տալով՝ այդ նպատակադրումները, որոնք 2018 թվականին եղան, և որոնց համար Նիկոլ Փաշինյանը գործուղվեց գործադիր իշխանություն, ըստ էության ամբողջովին տապալվեցին»։
Մեր զրուցակցի դիտարկմամբ՝ առաջին հերթին դատաիրավական համակարգը թողնվեց նույնը, երկու տարվա ընթացքում իրենց վրա վերցրին նախորդ ռեժիմի ժառանգորդությունը. «Եվ այն պայքարի իմիտացիան, որ տարվում էր՝ բոլոր սլաքներն ուղղելով Սահմանադրական դատարանի ուղղությամբ՝ իբրև հենց այդ օղակն է խանգարում իմ նշած խնդիրների լուծման համար, աբսուրդ է։ Այդ ամբողջ իմիտացիոն պայքարը տարվում էր ընդամենը Սահմանադրական դատարանի արդեն նոր բռնապետի, խանական Սահմանադրությամբ ամրագրված իշխանության ղեկավարի, իշխանությանն աջակցող մարդկանց գտնելու ու այնտեղ նստեցնելու համար։ Մենք տեսանք, որ այն խամաճիկ անձինք, ովքեր ընտրվեցին Սահմանադրական դատարանի դատավորներ, նախկին ռեժիմի տարիներին իրենց կենսագրությամբ հազարավոր ապացույցներ են բերել, որ իմ կողմից նշված հանցավոր խմբի հետ համագործակցող անձինք են, իրենց կենսագրությունն էլ դա ամբողջությամբ ցույց է տալիս»։
Ավագյանի խոսքով՝ նման խամաճիկ մարդկանց բերել նստեցնել Սահմանադրական դատարանում, նշանակում է, որ ինքը նույնպես, ընդունելով հակամարդկային ռեժիմի կանոնները, որի դեմ 2018-ին ապստամբել է հայ ժողովուրդը, պատրաստ է այդ համակարգի գլուխը կանգնել. «Ընդ որում՝ բոլոր կոմպոնենտների առումով։ Մենք գիտենք, որ հետսովետական, այսօր ռուսական կառավարման համակարգը իրենից չի ենթադրում անկախ դատական համակարգ ունենալ երկրում։ Դա ընդհակառակը՝ հակոտնյա է այդ կառավարման համակարգին։ Նիկոլ Փաշինյանը ընտրություն ուներ՝ կա՛մ ջախջախել այդ հակահայկական կառավարման համակարգը ու սերմեր դնել ինքնիշխան կառավարման համակարգի, այդ թվում՝ անկախ դատական համակարգի համար, կա՛մ ինքն ընդուներ Սերժ Սարգսյանի ժառանգությունը նաև այդ առումով։ Մենք տեսանք, որ այդ ճակատամարտում հայ ժողովուրդը պարտվեց՝ խաբվելով խաբեբա Նիկոլ Փաշինյանին ու նրա տված խոստումներին։ Նա, ըստ էության, վերածվել է նոր Սերժ Սարգսյանի»։
Մեր այն հարցին, թե ի՞նչ հույսով է այդ մարդկանց իշխանությունը բերել դատաիրավական համակարգ, արդյոք նրանց թույլ լինելու հանգամանքո՞վ, որպեսզի իրենց ենթարկեցնի, թե՞ Հայաստանում չկան որակյալ այլ մասնագետներ, Վահագն Ավագյանը պատասխանեց. «Շատ լեգիտիմ հարց եք տալիս։ Իհարկե, կան մասնագետներ բոլոր ոլորտներում։ Բայց նպատակը ո՞րն է՝ ինքնիշխան կառավարման համակարգ ունենա՞լը։ Հայ ժողովրդի արգանդը չի չորացել, այնքան որակյալ մասնագետներ կան, որ բոլոր ոլորտներում կարող են աշխատել։ Գալով հարցի առաջին հատվածին, թե ինչ հույսով են նախկին ռեժիմի խամաճիկներին բերել, դա ամբողջությամբ լեգիտիմ հարց է. այնքան ապիկար է Նիկոլ Փաշինյանի իշխանությունը, և իրենց հաշվարկներն այնքան տգետ էին, որ եթե վերանանք Սահմանադրական դատարանից ու տեսնենք, թե նա ինչպիսի կառավարում էր փորձում իրականացնել Վալերի Օսիպյաններով ու Արթուր Վանեցյաններով, ամեն ինչ կհասկանանք։ Նախնական պայմանավորվածությամբ իշխանությունը ստանձնելիս, ենթադրում եմ, նա ստորագրել է, որ այդ պաշտոններին հենց այդ մարդիկ են լինելու, այդ խոստումները սրբորեն պահպանվում են։ Բոլոր ոլորտներում ճգնաժամը պահպանվում է, ու ճգնաժամ չէր էլ լինի, եթե պետական ապարատը ըստ արժանվույն արձագանքեր հայ ժողովրդի բոլոր խնդիրներին։ Նիկոլ Փաշինյանը, ստանձնելով իշխանությունը, բոլոր ոլորտներում, այդ թվում նաև՝ Սահմանադրական դատարանում խամաճիկների միջոցով չի կարողանալու կառավարել, ու ճգնաժամերն էլ ավելի են խորանալու։ Այս առումով ձեր հարցն ամբողջությամբ լեգիտիմ է»։