Հոլանդական երկու թաղման բյուրո արդեն ստարտափին պատվիրել են սնկե դագաղների մեկական խմբաքանակ։
Նիդեռլանդների Դելֆտի տեխնոլոգիական համալսարանի հետազոտող Բոբ Հենդրիքսը սկսեց դագաղներ արտադրել սնկամարմնից՝ սնկի արմատային համակարգից, գրում Dezeen-ը:
Նախագծի հեղինակի խոսքով՝ նման դագաղը պարարտացնում և մաքրում է հողը, իսկ թաղված մարմինը մի քանի անգամ ավելի արագ է քայքայվում:
Loop Cocoon անունով դագաղը Հենդրիքսը նախագծել է Loop ստարտափի համար, որն առաջարկում է թաղման էկոլոգիապես մաքուր մեթոդներ:
«Նման դագաղի արտադրությունն էկոլոգիապես ավելի քան մաքուր է. արհեստական լույս կամ էլեկտրաէներգիա չի օգտագործվում: Կառուցվածքը հիմնականում բաղկացած է սնկից`բացի տեղափոխման համար հատակին ամրացված ձողերից, չնայած, դրանք էլ հնարավոր է հեռացնել: «Արկղի» ներսում մամուռ է աճում, ինչը նպաստում է մարմնի արագ քայքայմանը», – ասում է Հենդրիքսը:
Նա հստակեցրեց, որ նման դագաղ «աճեցնելը» տևում է մոտ երկու շաբաթ:
Երկու շաբաթվա ընթացքում սունկը անհրաժեշտ ձևն է ստանում, հետո չորանում է, ինչը ժամանակավորապես դադարեցնում է դրանց աճը: Հուղարկավորությունից հետո, գետնի տակ սնկամարմնի աճը վերսկսվում է,- ասվում է նկարագրության մեջ:
Նրա խոսքով՝ փայտե դագաղում թաղված մարմնի քայքայումը տևում է ավելի քան տասը տարի: Սնկամարմնից դագաղում դիակը երկու տարի անց վերածվում է պարարտանյութի:
«Հիմա մարդու մարմինը չի աղտոտի երկիրը, ընդհակառակը, կպարարտացնի այն», – ասում է ստարտափի հիմնադիրը:
