ԱՄՆ-ի Հարվարդի համալսարանում տեղի է ունեցել Շնոբելյան կատակ-մրցանակի հանձնման արարողությունը, որը շնորհվում է կասկածելի ու անհեթեթ գիտական նվաճումների ու գաղափարների համար: Հեռարձակումն անցկացվել է մրցանակաբաշխության կազմկոմիտեի կայքում:
2020թ.-ին բժշկական կրթության ոլորտում մրցանակի դափնեկիրներ են դարձել ՌԴ նախագահ Վլադիմիր Պուտինը, ԱՄՆ նախագահ Դոնալդ Թրամփը, Բելառուսի նախագահ Ալեքսանդր Լուկաշենկոն, ինչպես նաև հինգ այլ պետությունների ղեկավարներ:
«Բժշկական կրթության ոլորտի մրցանակը շնորհվել է Բրազիլիայի, Մեծ Բրիտանիայի, Հնդկաստանի, Մեքսիկայի, Բելառուսի, ԱՄՆ-ի, Թուրքիայի, Ռուսաստանի և Թուրքմենստանի ղեկավարներին այն բանի համար, որ նրանք կորոնավիրուսի համավարակի միջոցով կարողացան աշխարհին ցույց տալ, որ քաղաքական գործիչները կարող են ավելի մեծ ազդեցություն ունենալ կյանքի և մահվան վրա, քան գիտնականներն ու բժիշկները»,- հայտարարել է մրցանակի հիմնադիր Մարկ Աբրահամսը:
Այս անվանակարգում դափնեկիրներ են դարձել նաև Բրազիլիայի նախագահ Ժաիր Բոլսոնարուն, Մեծ Բրիտանիայի վարչապետ Բորիս Ջոնսոնը, Հնդկաստանի վարչապետ Նարենդրա Մոդին, Մեքսիկայի նախագահ Անդրես Մանուել Լոպես Օբրադորը, Թուրքմենստանի նախագահ Գուրբանգուլի Բերդիմուհամեդովը, Թուրքիայի նախագահ Ռեջեփ Թայիփ Էրդողանը: