Ադրբեջանական News.az կայքի փոխանցմամբ՝ Իգդիրից ընտրված պատգամավոր, «Ազգայնական շարժում» կուսակցությունը (ԱՇԿ) ներկայացնող, TÜRKSAM միջազգային հարաբերությունների ու ռազմավարական հետազոտությունների կենտրոնի նախագահ Սինան Օղանը մեկնաբանել է Հայաստանի նախագահ Սերժ Սարգսյանի ծաղկաձորյան հայտարարությունը, ինչի կապակցությամբ թուրք-ադրբեջանական կողմը մեծ հիստերիա է բարձրացրել.
«Դա ակնհայտորեն վկայում է Թուրքիայի նկատմամբ տարածքային հավակնությունների ներկայացման և պատերազմի հայտարարման մասին։ Սարգսյանի պատասխանը պետք է համապատասխան լինի, այն սանկցիաներ է նախատեսում այդ երկրի նկատմամբ։
Դժբախտաբար, «ֆուտբոլային» դիվանագիտությունը «հանգեցրել» է հայկական պետության ղեկավարի հանդգնությանը։ Դա հասել է անգամ նրան, որ բարձր տոնով խոսվում է այնպիսի մի երկրի հետ, ինչպիսին որ Թուրքիան է։ Մեր նախազգուշացումներն ուշադրության չեն արժանացել։ Սարգսյանի հայտարարությունը վկայում է, որ չարժեր ընդառաջ գնալ Հայաստանի հետ հարաբերությունների կարգավորմանը։
Սարգսյանին ուղղված վարչապետ Էրդողանի պատասխանը չի կարող բավարարել մեզ։ Թուրքիային բաց կերպ պատերազմ հայտարարողի պատասխանը պետք է ավելի կոշտ լիներ։ Պետք է այնպիսի կոշտ դիրքորոշում ցուցաբերվի, որ այդ մարդն իր խոսքերը հետ վերցնի ու ներողություն խնդրի»։
Սինան Օղանը նաև մեկնաբանել է օրեր առաջ Թուրքիայի արտգործնախարար Ահմեդ Դավութօղլուի այն հայտարարությունը, թե կգա ժամանակը, երբ հայերը կկարողանան Թուրքիայում անշարժ գույք ձեռք բերել և տեղավորվել.
«Սեպտեմբերի 11-ին պլանավորված է Երևան-Վան ավիաչվերթի բացումը։ Դա Սարգսյանին ուղղված պարգևատրություն է, ով տարածքային հավակնություններ է ներկայացրել Թուրքիային։ Մեր երկիրն անհապաղ պետք է վերջ դնի այդ նախաձեռնություններին, դադարեցնի Հայաստանի հետ բոլոր տիպի ոչ պաշտոնական շփումներին և փակի կապի բոլոր աղբյուրները։
Ակնհայտ է, որ Հայաստանը մտադիր չէ դադարեցնել Լեռնային Ղարաբաղի «օկուպացիան»։ Դրա հետ կապված՝ միջազգային հանրությունը «պետք է» վերանայի տվյալ խնդրի շուրջ իր դիրքորոշումը և հանդես գա նորանոր առաջարկներով՝ այդ «օկուպացմանը» վերջ դնելու համար»։
Հիշեցնենք, որ հուլիսի սկզբին Բաքվում տեղի ունեցած համայն աշխարհի ադրբեջանցիների 3-րդ համագումարի ժամանակ Օղանը հայտարարել էր. «Ինչ էլ որ Հայաստանն անի, միևնույն է՝ Ադրբեջանը «կվերադարձնի» Լեռնային Ղարաբաղը և հարակից 7 շրջանները։ Եթե Հայաստանը խելամիտ գտնվի, ապա նա «օկուպացված» տարածքները կվերադարձնի խաղաղ ճանապարհով։ Հակառակ դեպքում ես «վստահ» եմ, որ այդ հարցը կլուծի ադրբեջանական բանակը։
Ադրբեջանական ժողովուրդն «ունակ» է դա անելու։ Դա «ունակ» են անելու աշխարհում բնակվող 50 միլիոն ադրբեջանական թյուրքերը։ Դա «ունակ» է անելու 250 միլիոնանոց թյուրքական աշխարհը (300 միլիոն թյուրքեր)»։
