Հագուստ ներկրող տնտեսվարողներն արդեն մի քանի օր է բողոքում են ապրանքների մաքսազերծման ընթացակարգի փոփոխության դեմ: Նոր կարգավորումներով՝ Հայաստանում այսուհետ հագուստը կմաքսազերծվի ոչ թե կիլոգրամով, այլ՝ քանակով: Նախկինում ներկրված հագուստի համար վճարում էին կիլոգրամի դիմաց, իսկ այժմ պետք է վճարել բոլոր կտորների համար առանձին:
Պետական եկամուտների կոմիտեի փոխնախագահ Շուշան Ներսիսյանն «Առաջին լրատվական»-ի հետ զրույցում նշեց, որ օրենքի կարգավորումները ուժի մեջ են մտել սեպտեմբերի 1-ից: «Սեպտեմբերի 1-ից փոփոխությունն իրականացնելը բերում է և՛ տնտեսվարողների կողմից մաքսիմալ ճշգրիտ հայտարարագրման, և՛ հետագայում հարկային դաշտում տվյալ ապրանքի ճշգրիտ արտացոլմանը: Այլևս կիլոգրամով մաքսազերծում չի լինի, և ամեն ապրանք այսուհետև կհայտարարագրվի իր անունով»:
«Այն մտքերը և այն թվերը, որ հնչում են ցույցերի ժամանակ, հուսով եմ՝ շփոթմունք են, ոչ թե սաբոտաժ կամ հրահրում»,- նշեց ՊԵԿ փոխնախագահը՝ վստահեցնելով, որ այն գները, որ այժմ սահմանվել են, ինվոյսային արժեքից ցածր են:
Նա նաև հավելեց, որ ՊԵԿ այս որոշմամբ բազում հարցեր են լուծվում. «ՊԵԿ-ի առաջնային խնդիրը ամբողջությամբ ճշգրիտ հայտարարագրման դաշտ անցնելն է: Շահարկվում է բյուջեի հավաքագրման հարցը, այս քայլով բյուջեի հավաքագրումը առաջնային չէ: Այս քայլը նաև աջակցություն կլինի տեղական արտադրողներին»: ՊԵԿ-ը նպատակահարմար չի համարում հետաձգել անցումը հագուստի մաքսազերծման նոր կարգին. «Դա այլևս հնարավոր չէր, ժամանակն էր շուկան կարգավորել»,- ընդգծեց ՊԵԿ փոխնախարարը:
Մանրամասն՝ տեսանյութում: