Ժամանակն է ամրագրել, որ հոգեկան լուրջ խնդիրներ ունեցողները իրավունք չունեն զբաղեցնել քաղաքական բարձրագույն պաշտոն, հայտարարել է ԲՀԿ նախագահ Գագիկ Ծառուկյանն այն բանից հետո, երբ Հայաստանի վարչապետ Նիկոլ Փաշինյանն իր ֆեսբուքյան էջում աջակցելով ԿԳՄՍ նախարար Արայիկ Հարությունյանին հիշատակել էր ԲՀԿ նախագահի հետ կապված խմբակային բռնաբարության հայտնի պատմությունը:
Ակնառու է, որ «Իմ քայլը»-ԲՀԿ դիմակայությունը սրվում է այսպես ասած ամենաբարձր մակարդակով, ու դա տեղի է ունենում մեծ հանրահավաք իրականացնելու Գագիկ Ծառուկյանի հայտարարության ֆոնին: Ակնառու է նաև, որ իրաիճակը սրացման տանում է քաղաքական մեծամասնությունը: Դա պայմանավորված է սեփական ուժի հանդեպ վստահությամբ և այդպիսով գործընթացները ավելի սրելով հանգուցալուծում մոտեցնելու հաշվարկո՞վ, թե՞ Ծառուկյանի հայտարարած հանրահավաքի և ընդհանրապես ընդդիմադիր դաշտում տեղի ունեցող այսպես ասած կոնսոլիդացիոն փորձերի հանդեպ տագնապով: Թե՞ հակառակը՝ ԲՀԿ նախագահի գործողություններն են պայմանավորված տագնապով, որ քաղաքական մեծամասնությունը մինչև վերջ կտանի այն իրավական գործընթացը, որ ծավալվել է ԲՀԿ ընտրակաշառքի թեմայով հարուցված քրեական գործերով:
Ի դեպ, օրեր առաջ հարուցվեց ևս մեկը՝ Արարատցեմենտի աշխատակիցներին 2012 թվականին ԲՀԿ օգտին քվեարկություն պարտադրելու առնչությամբ: Միևնույն ժամանակ, «Իմ քայլը»-ԲՀԿ դիմակայության սրումը ըստ էության կարող է դոմինանտ դառնալ քաղաքական դաշտի մնացյալ խաղացողների նկատմամբ և նրանք կամ պետք է «հավաքագրվեն» Նիկոլ Փաշինյանի, կամ Ծառուկյանի դրոշի ներքո: Արդյո՞ք իշխանությունն այդպիսով հարվածելով ԲՀԿ-ին ավելի ուժեղ, ավելի է ուժեղացնում նրա ընդդիմադիր դիրքերը: Այլ կերպ ասած, արդյո՞ք գործ ենք ունենալու՝ «ինչը մեզ չի սպանում, ուժեղացնում է» հայտնի տրամաբանության կամ փիլիսոփայության հետ, որովհետև սրացման ինտենսիվությունը շարունակվելու դեպքում իրավիճակը իսկապես կհասնի մի կետի, երբ՝ քաղաքական իշխանությունը կամ քաղաքականապես կսպանի ԲՀԿ-ին, կամ տեղի կունենա հակառակը՝ ԲՀԿ-ին ավելի կուժեղացնի: