Ես սկզբունքորեն համաձայն չեմ ձևակերպման հետ, որ սահմանադրական փոփոխությունները, որոնք ուղղված էին սաահմանադրական մոդելի կյանքի կոչմանը, ունեին որևիցե անձնական հարթություն. Դրանք վերաբերում էին ինստիտուցիոնալ հարցերի կարգավորմանը: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Վլադիմիր Վարդանյանը:
Դիտարկմանը, որ արդեն հնչում են քննադատություններ, թե ի՞նչ իմաստ ուներ հեռացնել Հրայր Թովմասյանին, եթե նրան պետք է փոխարինի Խունդկարյանը, որը ևս նախկին ռեժիմի սպասարկու են համարում շատերը, Վլադիմիր Վարդանյանն ասաց. «Բացարձակապես որևէ համեմատություն չի կարելի իրականացնել թեկնածուների և որևէ մեկի միջե այն պարզ տրամաբանությունից ելնելով, որ մենք ի վերջո, տվյալ պարագայում ունենք, այսպես կոչված, ներառական մոտեցում: Դատավորների ընդհանուր ժողովը ձայների ճնշող մեծամասնությամբ հավանություն է տվել պարոն Խունդկարյանի թեկնածությանը, ՀՀ նախագահն անցկացրել էր մրցույթ և մրցութային հանձնաժողովի արդյունքների հիման վրա առաջարկել էր թեկնածուներին, որոնց շարքում էր պարոն Վաղարշյանը: Կառավարությունն էլ ներկայացրել էր պարոն Շաթիրյանի թեկնածությունը: Երեք թեկնածուներն էլ քննարկվել են ԱԺ-ում և պատգամավորներն իրենց քվեարկությամ արտահայտել են իրենց դիրքորոշումը»,-ասաց նա:
