Ինչ խոսք, դժվարությունները հիմա շատ են այն իմաստով, որ պետք է զգոն լինենք, որ դպրոցում աշակերտները, աշխատակիցները ջերմաչափվեն, օգտագործեն պարետատան սահմանած բոլոր միջոցները: Այս մասին «Առաջին լրատվական»-ի հետ զրույցում նշեց Երևանի Ֆրիտյոֆ Նանսենի անվան 150-րդ դպրոցի տնօրեն Մանյակ Հայրապետյանը:
Նրա խոսքով, դպրոցը շուրջ մեկ ամիս առաջվանից նախապատրաստվել է, որպեսզի բոլոր պայմաններն ապահովվեն դասապրոցեսը նորմալ սկսելու համար:
«Բոլոր դասարաններում, միջանցքներում, զուգարաններում կան ախտահանիչ նյութեր: Սկզբնական շրջանում գուցե դժվար կլինի,. Մինչև երեխաները հարմարվեն, որովհետև պետք է ջերմաչափվեն, ձեռքերն ախտահանեն, դասարանից դուրս չգան, որը երեխաների համար ծանր կլինի: Ես կարծում եմ՝ կլինի այնպես, ինչպես ուղեցույցով սահմանվել է»,-ընդգծեց նա: