ՀՀ ԱԳ նախարար Զոհրաբ Մնացականյանը պաշտոնական այցով մեկնել է Եգիպտոս, հանդիպումներ է ունեցել բարձրաստիճան պաշտոնյաների հետ: Այս և այլ թեմաների շուրջ «Առաջին լրատվական»-ը զրուցել է «Հանուն հանրապետության» քաղաքական նախաձեռնության անդամ, արաբագետ Սարգիս Գրիգորյանի և «Օրբելի» կենտրոնի փորձագետ Կարեն Վերանյանի հետ:
«Այս այցը պետք է դիտարկել Հայաստանի ռազմավարական հետաքրքրությունների շրջանակում: ՀՀ պաշտպանության նախարարը հայտարարել է ՀՀ ռազմավարական հետաքրքրությունների շրջանակի լայնացման մասին, ինչը շատ կարևոր է, մինչ այդ մենք սահմանափակ հավակնություններ ունեինք արտաքին քաղաքականությունում և ռազմավարական շահերի տեսանկյունից: Եվ հիմնական մեխը տարածաշրջանային անվտանգությունն ու կայունությունն է, որը փորձ է կատարվում խախտել Թուրքիայի և տարբեր խաղացողների կողմից: Այս տեսանկյունից կարևոր նշանակություն ունի ՀՀ արտգործնախարարի այցը Եգիպտոս: Սա «նախահարձակ» նախաձեռնություն է հակաթուրքական բևեռում ընթացող գործընթացներում մեր դիրքն ամրապնդելու, մեր ներգրավվածությունն ապահովելու տեսանկյունից: Թուրքիային զսպելու ուղղությամբ ՀՀ քայլերը հավասարակշռված ու թիրախավորված են»,- նշեց Կարեն Վերանյանը:
Սարգիս Գրիգորյանի դիտարկմամբ՝ ՀՀ արտաքին գերատեսչության աշխատանքներում նկատելի են որոշակի շեշտադրումներ և դրանց ուղղությամբ կատարվող քայլեր, ինչը ողջունելի է: «Եգիպտոսը դարձել է օրակարգ թելադրող, և Եգիպտոսի հետ հարաբերությունների կարգավորումը, ընդհանուր տեսլականների մասին առնչվելը կարևոր է»:
Մանրամասն՝ տեսանյութում:
