Լուրեր
Այս ուղեցույցը հրապարակվել է ոչ թե դպրոցների, այլ կարծես Օսվենցիմ համակենտրոնացման ճամբարի համար

Համավարակով և արտակարգ դրությամբ պայմանավորված՝ այս տարի ուսումնական տարին մեկնարկեց սեպտեմբերի 14-ին: Կրթական թեմաների շուրջ «Առաջին լրատվական»-ը զրուցել է «Արեգնազան» կրթահամալիրի ուսուցիչներ Արա Աթայանի և Անահիտ Թադևոսյանի հետ:

Գրեթե կես տարի մեկուսացումից հետո աշակերտները պետք է դպրոց գնան, ԿԳՄՍՆ-ն հատուկ ուղեցույց է հրապարակել, ինչը տարբեր արձագանքների է արժանացել: Արա Աթայանի խոսքով՝ ԿԳՄՍՆ-ի աշխատանքներին խառնվել է նաև մանկավարժության հետ որևէ կապ չունեցող ատյան: «Ուղեցույցում կան էջեր, որոնք համակենտրոնացման ճամբար են հիշեցնում: Խնդիրն այն է, որ հերթական անգամ չինովնիկական «ստրախովկայի» պատճառով ունենում ենք կրկնակի ստանդարտ, և արդեն մոտ ենք նրան, որ երևի դիմենք, որ դպրոցը վերանվանվի կրթական թեքումով ռեստորան, քանի որ համավարակի ժամանակ փողոցից 40 մարդ կարող է մտնել և նստել ռեստորանում, 8 հոգով նստել մեկ սեղանի շուրջ, իսկ սոցիալական ամենաանպաշտպան, խոցելի խավը՝ երեխաները, որ մյուս կողմից՝ COVID-ից ամենապաշտպանվածն է (այն առումով, որ երեխաները հիմնականում չեն հիվանդանում, կամ ծանր չեն հիվանդանում), պետք է գամված նստեն աթոռներին, գրատախտակին մոտենալու, իրեր փոխանակելու, որևէ խմբային գործունեություն վարելու և դասամիջոցի հնարավորություն չեն ունենալու: Այս տրամաբանությամբ նոյեմբերին գալու է նոր սեզոնային գրիպ և հնարավոր է նաև COVID-ի աճ գրանցվի, և երեխաները պիկը կդիմավորեն թուլացած իմունային համակարգով: Նրանք պետք է շարժվեին, դասամիջոցին դուրս վազեին, արև տեսնեին, թթվածին շնչեին, և մենք պետք է արտակարգ միջոցներ ձեռնարկեինք, որպեսզի երեխաներին և՛ հոգեպես, և՛ ֆիզիկապես ավելի ամուր դարձնեինք»:

Անահիտ Թադևոսյանն անդրադարձավ հեռավար կրթության վնասներին: «Ջերմությունը շատ անհրաժեշտ է մարդկային հարաբերությունների մեջ: Ինձ համար հետաքրքիր չէ միայն գիտելիք տալը, հետաքրքիր է երեխաների զարգացումը տեսնելը: Իսկ զարգացումը դիտարկելու համար պետք է երեխաներին տեսնել»,- նշեց Ա. Թադևոսյանը:

Մանրամասն՝ տեսանյութում:

  • Դիտումներ՝ *