Վաղը՝ սեպտեմբերի 15-ին մասնակիորեն վերաբացվում են նաև մանկապարտեզները։ Այսօր առավոտից արդեն նախակրթարանները պատրաստ, պարետատան կանոններին համապատասխան՝ կահավորած, հակահամաճարակային բոլոր կանոններին համապատասխան պատրաստ են դիմավորելու երեխաներին։
Երևանի թիվ 1 մանկապարտեզի տնօրեն Ալլա Հովհաննիսյանն ասաց, որ իրենք մինչ այդ էլ հերթապահ մանկապարտեզ են եղել կենտրոն վարչական շրջանում, աշխատել են և, բարեբախտաբար, որևէ վարակի դեպք մինչ այսօր չի գրանցվել ոչ աշխատակիցների, ոչ էլ՝ երեխաների շրջանում։
Տնօրենն ասաց, որ վաղը պատրաստվում են դիմավորել ևս 72 երեխայի, որոնք բաշխվելու են առանձին խմբերում։ Յուրաքանչյուր խումբ համալրվելու է առավելագույնը 12 երեխայով, որոնք մանկապարտեզ են հաճախել 2019-2020 ուստարում:
Քաղաքապետարանի որոշման համաձայն այս փուլում առաջնահերթությունը տրվելու է աշխատող ծնողների 5-6 տարեկան երեխաներին, առաջին կամ երկրորդ կարգի հաշմանդամություն ունեցող ծնողի երեխային, տվյալ հաստատության աշխատակցի երեխային: Հերթագրված երեխաների ընդունելությունը ժամանակավորապես կասեցված է:
Երեխաներին մանկապարտեզ բերող ծնողները հանգիստ էին։ Սկզբնական շրջանում մտավախություններ ունեցել են, բայց մանկապարտեզի սանիտարահիգիենիկ վիճակը, հակահամաճարակային խիստ կանոնները, որոնք մշտապես պահպանվում են, թույլ է տրվել ծնողներին հանգստությամբ երեխային բերել մանկապարտեզ։
Երեխաները ամեն օր ջերմաչափվում են, առավոտյան մանկապարտեզի շենք մտնելիս ախտահանվում են նրանց կոշիկները, ձեռքերը, անկողինն ամեն օր վերադարձվում է ծնողին՝ հաջորդ օրը լվացած ու պարտադիր արդուկած բերելու պահանջով։ Տնօրենն ասաց, որ շատ խիստ են մոտենում այս բոլոր կանոններին, ինչն էլ իրենց թույլ է տալիս խուսափել հնարավոր վարակի դեպքերից։
Առավել մանրամասն՝ տեսանյութում