Լիբիայի արևելքում գործող ժամանակավոր կառավարությունը հրաժարական է տվել։ Այս մասին, Reuters գործակալության փոխանցմամբ, ասվում է համապատասխան հայտարարության մեջ։
Գործակալության փոխանցմամբ, խորհրդարանի ղեկավար Ագիլա Սալեհը և ժամանակավոր կառավարության ղեկավար Աբդալլահ աթ-Թանին սեպտեմբերի 13-ին շտապ հանդիպում են անցկացրել, որի ընթացքում քննարկել են երկրում կենսական պայմանների բարելավման հնարավորությունները։ Կյանքի մակարդակի անկումը բողոքի ակցիաներ է առաջացրել երկրում, որոնք տեղի են ունեցել վերջին մի քանի օրերի ընթացքում։
Նշվում է, որ հրաժարականի դիմումը կքննարկվի Ներկայացուցիչների պալատի կողմից:
2011-թվականից Լիբիայում երկիշխան ռեժմիմ հաստատվեց՝ նախկին առաջնորդ Մուամար Կադաֆիի ռեժիմի տապալվելուց հետո։ Լիբիայի արևելքում գործում է խորհրդարանը, որին աջակցում է Լիբիայի ազգային բանակի հրամանատար Խալիֆա Հաֆթարի բանակը: Երկրում ևս մեկ խոշոր քաղաքական ուժ է համարվում Լիբիայի ազգային համաձայնության կառավարությունը, որը վերահսկում է Տրիպոլին և երկրի արևմուտքում գտնվող տարածքները:
