ԲՀԿ առաջնորդ Գագիկ Ծառուկյանը ԲՀԿ Ապարանի տարածքային կազմակերպության անդամների և պատասխանատուների հետ հանդիպման ժամանակ նշել է, որ իշխանությունը պետք է ոչ թե Ծառուկյանից, այլ ժողովրդից վախենա, որ այսպիսի ծանր վիճակում ժողովուրդը երբեք չի եղել։ «Արդեն երրորդ տարին է գալիս, իրենց ոչ մի ասած չի իրականացել: Գույքահարկն ավելացրել են»,- ասել է Ծառուկյանը։
ԳԽ նախկին պատգամավոր, նախկին քաղբանտարկյալ Ազատ Արշակյանն, «Առաջին լրատվական»-ի հետ զրույցում անդրադառնալով Ծառուկյանի այս հայտարարությանը, նշեց․«Այն, որ վատ է ապրում Հայաստանը, հետ է մնում, դա միանշանակ է, որովհետև Ծառուկյանի և իր գործընկերների գործատուն՝ Եվրասիական միությունը, Մաքսային միությունը, բռնապետների և աղքատների միություն է։ Այդ միությունում չի կարող լինել առաջընթաց, չի կարող լինել հարստացում։ Երբ Հայաստանը շուռ էին տալիս դեպի ԵՄ բռնած կուրսից և տանում էին աղքատների և հետադիմության միություն, այն ժամանակ պետք է մտածեին՝ հայ ժողովուրդը լա՞վ է ապրելու, թե՞ վատ է ապրելու, աղքատ ապրելը լա՞վ է, թե՞ վատ է, և հիմա էլ դեռ ուշ չէ, և հիմա էլ որոշ ուժեր, այդ թվում՝ ԲՀԿ-ն, ներկայացնում են հետադիմական ուժերի շահերը Հայաստանում, այսինքն՝ հայելու մեջ թող նայի նախ ԲՀԿ-ն իրեն և կտեսնի վատ ապրելու պատճառը»։
Անդրադառնալով Ծառուկյանի դիտարկմանը, թե իշխանությունը պետք է ոչ թե Ծառուկյանից, այլ ժողովրդից վախենա, Արշակյանը նկատեց, որ Ծառուկյանն իսկապես սարսափելի չէ, Ծառուկյանն ինքը պետք է վախենա և վախենում է ժողովրդից, քանի որ հանրության ցասումը պետք է գա սրբի հանրության վզին փաթաթված ուժերին, ԲՀԿ-ին՝ իր ղազագրերով, հուշագրերով․«Կարծում եմ՝ հանրությունը պետք է սրբի նրանց քաղաքական հարթակից, և Հայաստանը հռչակի ազատ, անկախ և զարգացող առաջադիմող պետություն։ Զարմանալի է, որ դրա մասին խոսում է «Եդինայա Ռոսիա»-ի հետ ղազագիր ստորագրած պետության ղեկավարը»։
Արշակյանի դիտարկմամբ՝ իշխանությունը չպետք է ԲՀԿ-ին հայտարարեր գործընկեր և հիմա էլ ստիպված լիներ հաշվետվություն տալու, ականջալուր լինելու, ինչու է ճանաչել նրան որպես գործընկեր․ «Բա, նրանք գործընկե՞ր են, նրանք գործընկեր չեն, քաղաքական և կամային և քաղաքական ընդդիմություն չեն։ ՀՀ իշխանությունը, այո՛, քաղաքական մրցակցի, քաղաքական գործընկերոջ կարիք ունի։ Դա օրակարգային հարց է ՀՀ քաղաքական մեծամասնության համար»։
Արշակյանը չի բացառում, որ շատ հնարավոր է՝ ԲՀԿ-ն այնքան սուր տագնապ ունի Բելառուսի այսօրվա դեպքերից, նրանց ազդեցության տակ է․«Չէ՞ որ նրանք էլ գործընկերներ են, ԲՀԿ-ն Բելառուսի գործընկերն է, որ այդ հիստերիայի մեջ է, այսինքն՝ ես համարում եմ՝ դա նաև քաղաքական հիստերիա է, և այն, ինչ տեղի է ունենում Բելառուսում, հուսահատեցրել է իրենց, պանիկյորները այդպես են իրենց պահում տագնապի ժամանակ, և եթե հասարակությունը աշխուժանա, դուրս գա այս հետհեղափոխական թմբիրից, ԲՀԿ-ները լինելու են թիրախը։ Ասում է, որ օձի գլուխը, որ սողում է, ճամփա է դուրս գալիս, նրանք արագացնում, մոտեցնում են իրենց գործունեության վախճանը»։