Նախօրեին Հայաստանի Հանրապետության Անվտանգության խորհրդի քարտուղար Արմեն Գրիգորյանն ընդունել է Հայաստանում Իրանի Իսլամական Հանրապետության արտակարգ և լիազոր դեսպան Ն. Գ. Աբբաս Բադախշան Զոհուրիին:
Facebook-ի իր պաշտոնական էջում Գրիգորյանը հայտնում է, որ հանդիպման ընթացքում ինքը՝ որպես ԱԽ քարտուղար, կարևորել է հայ-իրանական բարիդրացիական հարաբերությունները, անդրադարձել տարածաշրջանային ռազմավարական ենթակառուցվածքների զարգացմանը, ինչպես նաև տարածաշրջանային ռազմաքաղաքական անվտանգային իրավիճակին: Կողմերը վերահաստատել են պատրաստակամությունը շարունակելու արդյունավետ փոխգործակցությունն անվտանգության, տնտեսության, ենթակառուցվածքների զարգացման, գիտության և այլ ոլորտներում:
«Համոզմունք եմ հայտնել, որ երկկողմ հարաբերությունների հետագա զարգացման և խորացման համար առկա է չօգտագործված ներուժ, ինչը կարող է տարբեր ոլորտներում փոխգործակցության նոր հնարավորություններ ստեղծել»,- գրել է Արմեն Գրիգորյանը։
Հետաքրքիր է, որ ԱԽ քարտուղարի և Իրանի դեսպանի հանդիպումը հաջորդել է Բաքվում Իրանի դեսպանի՝ Լեռնային Ղարաբաղի կոնֆլիկտին վերաբերող հայտարարությանը։ Այն ադրբեջանական մի շարք ԶԼՄ-ներում մեկնաբանվել ու ներկայացվել էր Ադրբեջանին ձեռնտու տարբերակով։ Ըստ դրանց՝ Իրանի դեսպան Սեյեդ Աբբաս Մուսավին հայտարարել էր, թե «իրանա-ադրբեջանական բարեկամական, բարիդրացիական հարաբերությունները առանձնահատուկ հարաբերություններ են, որոնց չի կարող խանգարել ոչ մի երրորդ ուժ», ու իբրև թե Իրանն աջակցում է Ադրբեջանի «արդարացի» դիրքորոշմանը «ադրբեջանական օկուպացված տարածքների վերաբերյալ» և պաշտպանում է այդ երկրի տարածքային ամբողջականությունը։
Իրանագետ Էմմա Բեգիջանյանն «Առաջին լրատվական»-ի հետ զրույցում նշեց՝ Թեհրանի դիրքորոշման մեջ որևէ փոփոխություն չկա. «Իրանը մշտապես հայտարարել է, որ հարցի լուծումը տեսնում է Ադրբեջանի տարածքային ամբողջականության սկզբունքով: Սա Իրանի պաշտոնական տեսակետն է, որն առաջին անգամ չէ, որ հայտարարվել է։ Եթե հետևել եք՝ տավուշյան իրադարձությունների ժամանակ էլ նման հայտարարություններ եղան։ Պարզապես հիմա մի քիչ ավելի շեշտված էր, բայց առանձնապես ոչինչ չի փոխվել։ Այլ հարց է, որ ոչ պաշտոնական մակարդակով Իրանը դրան երևի այնքան էլ համաձայն չէ։ Իսկ պաշտոնական տեսակետը շատ հանգամանքներով է պայմանավորված, այդ թվում՝ վերջին շրջանում Բաքվի և Թուրքիայի փոխհարաբերությունների առավել ջերմացմամբ, նաև այդ երկրների բուռն պանթուրքիստական քարոզչությամբ, որի թիրախը Իրանի հյուսիսի թրքախոս բնակչությունն է։ Սա որևէ նոր, արտառոց որևէ բան չէ, պարզապես հերթական անգամ նշվել է։ Մի պաշտոնյա ավելի շեշտված է ասում, մյուսը՝ ավելի մեղմ։ Սրանք ընդամենը մանրուքներ են, որից հարցի բուն էությունը չի փոխվում։ Սա Իրանի պաշտոնական տեսակետն է, որն արտահայտվում է Իսլամական համագործակցության կազմակերպության համաժողովներին, իսլամական ու ոչ իսլամական այլ միջազգային ատյաններում։ Այնպես որ, կարծում եմ, որևէ նորություն չկա, ու չեմ էլ կարծում՝ այս հարցում պետք է շատ խորանալ ու այն ուշադրության կենտրոնում պահել»։
Էմմա Բեգիջանյանը ողջունում է նաև Հայաստանի ԱԽ քարտուղարի հանդիպումը Հայաստանում Իրանի Իսլամական Հանրապետության արտակարգ և լիազոր դեսպան Ն. Գ. Աբբաս Բադախշան Զոհուրիի հետ. «Նման շփումները ես դրական եմ գնահատում, պետք է տեղեկացնել, որ Հայաստանում հետևում են բոլոր հայտարարություններին ու իրադարձություններին»։
Իրանի դիրքորոշումը ղարաբաղյան հակամարտության վերաբերյալ իրանագետը ներկայացնում է հետևյալ կերպ. «Իրանի շահերը պահանջում են ունենալ հայամետ դիրքորոշում։ Պարզապես հենց այս հանգամանքը հաշվի առնելով՝ Ադրբեջանը մշտապես Իրանին մեղադրում է դրա մեջ։ Մյուս կողմից՝ Իրանը, լինելով իսլամական երկիր, իսլամական երկրներին հովանավորելու հայտարարություններով հանդես գալով պետք է Ադրբեջանին պաշտպանի։ Իրանի համար դա շատ դժվար հարց է։ Իրանը ձգտում է լինել չեզոք ու հավասարակշիռ։ Բայց ես մշտապես նշել եմ, որ ո՛չ Իրանը ու ոչ էլ Թուրքիան ղարաբաղյան հարցում չեն կարող լինել միջնորդի դերում»։